Општина Кочани

Карта на општина Кочани со селските атари.

Демографска карта на општина Кочани со селските атари.

Карта на општината.

Општина Кочани — општина во Источна Македонија. Седиште на општината е градот Кочани.

Географиja

Општина Кочани се наоѓа во источниот дел на Република Македонија, лоцирана на севроисточната страна на Кочанската котлина и југоисточната страна на Осоговските планини. Зафаќа површина 360,32 км², со најниска надморска височина од 320 м и највисока 2.085 м.

Општината се граничи со:

• север - Општина Крива Паланка
• исток - Општина Македонска Каменица
• југоисток - Општина Виница
• југ - Општина Зрновци
• запад - Општина Чешиново-Облешево
• запад - Општина Пробиштип
• северозапад - Општина Кратово

Општина Кочани има 28 населени места, од кои 1 е градско и 27 селски.

Историja

Поради поволната географска местоположба и одличните природни карактеристики, територијата на денешниот град Кочани била населена од најстарите антички времиња, најпрво од Пеонците, Медите и Траките, а во 80- те години од VI век почнуваат да се населуваат Словените, поточно до VII век припадници на племето Смолјани ја колонизираат Кочанската Котлина и се утврдуваат во неа. Браќата Кирил и Методиј, основоположниците на словенската писменост од 845- 855 г. престојувајќи во Брегалничката област (Мородвис) отпочнале со ширење на христијанството на словенски јазик.

Демографија

Според пописот на населението од 2002 г. во општина Кочани живеат 38 092 жители, од кои:

• Македонци 35 472 (93,12%)
• Роми 1951 (5,12%)
• Турци 315 (0,83%)
• Власи 194 (0,50%)
• Срби 63 (0,17%)
• останати 97 (0,26%)

Општествени институции

• ЦК “Бели мугри“
• Основен суд
• Здравствен дом
• Општа болница

Администрација и политика

Административно седиште на Општината е градот Кочани. На локалните избори во октомври 2017 година за градоначалник на Општината е избран Николчо Илијев како натпартиски кандидат предложен од коалицијата што ја предводеше СДСМ. Општинскиот совет брои 19 членови, од кои 10 се од коалицијата на СДСМ, 8 од коалицијата на ВМРО-ДПМНЕ и 1 од Независна листа.

Културни и природни знаменитости

• Долно Градиште
• вештачко езеро Гратче
• Пониква
• Раткова скала
• Дабот кај с. Бели
• Споменик на слободата

Земјоделство

Традиционална стопанска гранка во општина Кочани е земјоделството за кое постојат одлични природни и агротехнички услови. Почвата е плодна од алувијално потекло. Најголем дел од обработливите површини се наводнуваат, поради што има изградено акумулациони објекти и разгранета каналска мрежа од 280 км.

Оризот е најзначајна земјоделска култура со многувековна традиција, високи приноси и одличен квалитет. Годишно се сеат околу 3500 хектари под ориз, со принос од над 5000 кг/ха. Застапени сорти на оризова култура се монтичели, Р-76/6, Сан Андреа, Прима риска, и Монтеса. Квалитетот на оризот е потврден на Еурека-2000 во Брисел со признание Гран-при Најдоброто од Македонија, со заштитен знак бр. 1- оризот, белото кочанско злато.

Редовни настани

• Драмски аматерски фестивал (мај)
• Денови на кочанскиот ориз (септември)

Личности

• Александар Алексиев, романописец, критичар, книжевен историчар и театролог
• Борис Стојчев, театролог и публицист
• Бранко Пендовски, писател
• Благоја Попов, политичар
• проф. д-р Благој Попов, математичар
• Кирил Ѕ'мбов, нуклеарен физичар
• д-р Константин Апостолов, лекар специјалист по микробиологија
• Кочани Оркестар, блех оркестар
• Малина Попиванова, револуционерка
• проф. д-р Миле Хаџи Василев, правник
• Насе Насев, спортски директор на Македонскиот Олимписки Комитет (МОК)
• Ристо Јуруков, музички педагог
• Сашко Насев, писател, драматург и поранешен амбасадор на Република Македонија во Канада
• Стефан Попиванов, револуционер
• Стево Теодосиевски, музички уметник
• Симеон Иванов - Канго, гитарист, рок-музичар
• Харалампие Манчев, лекар специјалист, прв македонски медицински истражувач

Култура и спорт

Културните збиднувања се остваруваат во бројни институции , за која цел се изградени разновидни објекти ( Дом на културата, кино и сл.). Во Кочани постојат неколку фолклорни друштва кои го негуваат фолклорот, а се негува и драмскиот аматеризам. Секоја година традиционално се одржува ДАФ (Драмски Аматерски Фестивал) во месец мај и Деновите на оризот, во месец септември.

За развој на спортот во градот има изградено спортска сала, фудбалски стадион, базен, терени за тенис, мини голф и слично. Постојат голем број на спортски клубови и здруженија во кои се развиваат различни спортови: борење, кошарка, фудбал, гимнастика, карате, шах, и др. Кочани бил домаќин на државни и меѓународни културни и спортски случувања.

Иселеништво

Иселеништвото во општината има неколкудецениска традиција, при што главно младата популација, поради економски причини, емигрирала во Западноевропските земји - во почетокот во Германија, Франција и Австрија, а во последната деценија во Италија и делумно САД, Канада и Австралија.

Поврзано

• Инфо-Кочани

Надворешни врски

• Општина Кочани во „АБВ - деловен именик“
• Веб страница на општината