Тетовско архијерејско намесништво

Тетовско архијерејско намесништво — архијерејско намесништво во состав на Тетовско-гостиварската епархија задолжено за градот Тетово и околината.

Од 1971 г. заклучно со 1996 г. година во оваа епархија се извршени 66,753 крштевки. Оваа епархија има 38 активни свештеници и неколку пензионери. Во текот на овие години се изградени 26 цркви, 11 манастири, 69 обновени и изградени објекти за крштевки и задушници. Над поголем број цркви и манастири извршени се целокупни санации и реставраторски работи со што се заштитени од понатамошно пропаѓање.

Намесништвото е сместено во соборниот храм подигнат во чест на „Свети Свети Кирил и Методиј“. Има 8 парохии а нив ги опслужуваат девет свештени лица. Архијерејското намесништво Тетово брои 72 цркви, 10 манастири, 6 параклиси и 1 крст.

Парохии

Намесништвото обединува според податоци од 2001 г. околу 18.000 православни христијани, но поради војната нивниот број денеска не е потврден.

Преглед на намесништвото по парохии:

Прва тетовска парохија - главна парохиска црква е црквата „Свети Свети Кирил и Методиј“ која ја опслужува протојереј Предраг Исаевски. Ги опфаќа само црквите во градот кои не се наведени подолу.

Втора тетовска парохија - главна парохиска црква е црквата „Свети Свети Кирил и Методиј“ ја опслужува протојереј-ставрофор Мирко Станковски. Во составот на овие две парохии се и селата: Џепчиште, Једоарце, Отуње, Сетоле, Непроштено и Лукојца.

Трета тетовска парохија - главна парохиска црква е црквата „Света Богородица“ и ја опслужува протојереј Томислав Јосифовски, таа покрај дел од градот ги опфаќа и селата: Сараќино, Долно Палчиште и Мала Речица.

Четврта тетовска парохија - главна парохиска црква е црквата „Свети Никола“ која ја опслужува протојереј-ставрофор Ратко Милановски, а во состав на оваа парохија покрај дел од градот опфатени се и селата: Лавце, Долна Лешница и Требош како и манастирскиот комплекс „Свети Атанасиј“ којшто се наоѓа на месноста Балтепе над Тетово.

Милетинската парохија ја опслужува свештеникот Ненад Ѓорѓевски и таа ги опфаќа селата: Милетино, Челопек, Блаце, Теново, Стенче, Волковија и Радиовце.

Брвеничката парохија ја опслужува Ивица Спасеноски и таа ги опфаќа селата: Брвеница, Долно Седларце и Фалише.

Теаречката парохија ја опслужува протојереј-ставрофор Димитрије Крстески и опфатени се селата: Теарце, Отушиште, Лешок, Слатино, Ратае, Варвара, Брезно, Жилче, Шемшево и Прељубиште. Во составот на оваа парохија е и манастирскиот комплекс Свети Атанасиј и „Света Богородица“ од с. Лешок.

Сиричинско-раотинската парохија ја опслужува свештеникот Дарко Наумовски а опфатени се селата: Сиричино, Туденце, Копанце, Раотинце, Јанчиште, Подбреѓе и Јегуновце.

Вратничката парохија ја опслужува свештеникот Перица Бојковски. Таа ги опфаќа селата: Вратница, Старо Село, Рогачево, Беловиште, Одри, Доброште, Глоѓи, и Јелошник.

Оштетувања во конфликтот од 2001 година

За жал, за време на војната во 2001 г. значителен дел од црквите што ги обединува Тетовското архијерејско намесништво претрпеле сериозни оштетувања како мета на терористичките напади на ОНА и нивните соработници. Оттогаш, многу од објектите се обновени.

Идни проекти

Во последнава деценија е посебно нагласена иницијативата на верниците за обновување и подигање на нови цркви, која е масовно поддржана од верниците преселени во западноевропските и прекуокеанските земји. Се подигаат нови цркви и црковни придружни објекти, поради зголемениот интерес на населението за црковно и духовно живеење.

Надворешни врски

Портал на Тетовското архијерејско намесништво