Горобинци

Горобинци
Поглед на селото
Горобинци Местоположба на Горобинци во Македонија
Координати 41°52′29″N 21°52′37″E
Регион	Овче Поле
Општина	Општина Свети Николе
Население	820 жит. (поп. 2002)
Повик. бр.	032
Надм. вис.	432 м
Горобинци на општинската карта  Атарот на Горобинци во рамките на општината
Горобинци на Ризницата

Горобинци — село во Општина Свети Николе, во областа Овче Поле, одалечено 6 км од градот Свети Николе.

Црквата „Вознесение Христово“‎

Географиja и местоположба

Селото е оддалечено 6км од градот. Меѓутоа неговата географска положба е уште поповолна со фактот што има директен пат од селото кон Скопје долг само 50км. Во иднина источната магистрала Скопје-Штип треба да поминува токму низ атарот на селото.

Историja

Во минатото било турско село и се викало Винци. Со заминувањето на Турците се населиле Македонците, па и името се сменило во Горобинци. Во 14-тиот век во Овчеполската околија, кај месноста Јавор,каде сѐ уште стои дрвото јавор старо неколку века, постоело селото Горно Винци. Спроти селото се издигал еден рид, каде што жителите секое лето го празнувале празникот Св. Илија. Секој Илинден, тие се собирале на врвот од ридот и играле ора. Тогаш доаѓале најубавите девојки од селото и од околните места за да се фатат на оро. Како ви сите села така и на ова место, имало турски вооружени чувари, наречени полјаци, кои, покрај земањето данок, раководеле и со имотот на селото. За еден празник Св. Илија, додека девојките играле на оро, жената на еден од Турците чувари,затскриена зад прозорецот од својата куќа гледала како надвор се веселат македонските жени. Кога нејзиниот маж ја прашал зошто е тажна, таа рекла: "Гледај, ене она е убаво! Види како жените играат, рацете и нозете им се откриени, а јас седам сама затворена во четири sида со фереџе на лицето". Турчинот, се разлутил што го слуша ова,нанишанил со пушката од прозорецот и ја отепал првата девојка фатена на орото. По оваа случка, селаните почнале да го напуштаат местото Горно Винци и да се селат на местото каде денес се наоѓа селото Горобинци. Тоа е на 6 километри од Свети Николе. Не многу далеку од ридот на кој била отепана девојката. Името Горобинци, како што се вели во пишаните документи од Турско, го добило затоа што на Турците им било тешко да го изговорат зборот "винци". Во оваа легенда и денес веруваат селаните. Денес на врвот од ридот , стои каменот забиен во земја со крст одозгора. Секој Илинден таму селаните масовно одат, палат свеќи и го слават празникот.

Економија

Наслението главно се занимава со полјоделство, а во помала мера и со сточарство. Нафтоводот АМБО би поминувал во непосредна близина на селото.

Демографија

Според статистиката на Васил К'нчов („Македониja, Етнографиja и статистика“) од 1900 година, во Горобинци живееле 440 жители, сите Турци.

Според Димитар Гаџанов во 1916 година, во селото имало 70 Турци.

Според последниот попис на населението на Македонија од 2002 година, селото има 820 жители. Следува табела на националната структура на населението:

Националност	Вкупно
Македонци	811
Турци	1
Роми	0
Албанци	0
Власи	0
Срби	8
Бошњаци	0
Други	0

На табелата е прикажан националниот состав на населението низ сите пописни години:

Години	Македонци	Албанци	Турци	Роми	Власи	Срби	Бошњаци	Ост.	Вкупно
1948	—	—	—	—	—	—	—	—	1.274
1953	625	—	729	—	—	4	...	9	1.367
1961	1.148	—	12	...	...	51	...	12	1.223
1971	1.057	—	3	—	...	36	...	5	1.101
1981	1.011	—	4	—	—	42	...	4	1.061
1991	908	1	1	—	—	31	...	3	944
1994	868	—	—	—	—	21	...	1	890
2002	811	—	1	—	—	8	—	—	820

Општествени институции

• Црква „Вознесение Христово“‎

На врвот од планината Ѓуриште се наоѓа еден од трите главни Радарски центри во Македонија, МПРЦ "Ѓуриште", на Управата за Хидрометеоролошки Работи. А во минатото бил и единствен. Во селото се наоѓа и основното училиште "Гоце Делчев". Има и амбуланта, пошта, клуб на пензионери и др.

Културни и природни знаменитости

Непосредно над селото се наоѓа локалитетот Ѓуриште, кое претставува честа излетничка дестинација за граѓаните на Св.Николе, па дури и на некои скопјани.

Редовни настани

Секоја година се прославува селската слава Вознесение Христово, меѓу народот познато како Спасовден, а во селото е изградена и цркавата со истото име, која изобилува со живописен иконостас. Исто така секоја година на Први мај се одржуваат традиционалните Првомајски трки и натпревари, кои ги посетуваат гости од целата држава. Од пред неколку години на истиот ден се одржува и Ме ѓународната велосипедска трка “Делчо Ангелов“ .

Личности

• Д-р Стојмил Петковски - учесник во конзилиарниот тим за спас на животот на американскиот претседател Роналд Реган, по атентатот извршен врз него.
• Гоне Петковски - историчар и поранешен амбасадор.
• Борис Начков - собирач на македонски народни песни кој досега има издадено три збирки со народни песни.
• Делчо Ангелов - познат велосипедист кој направи тура низ Европа од 14000 км, живее и работи во Швајцарија.

Култура и спорт

Активно работи и културно уметничко друштво, кое пред се го негува македонскиот фолклор. Во селото постои и успешно настапува фудбалскиот клуб Стрела.

Иселеништво

Во текот на 50-тите години од минатиот век, масовно се иселувало Турското население кое живеело во селото околу 4 векови. Најголемиот дел од нив се иселени во Измир,Турција. Во поново време за одбележување е дека жителите од Горобинци во значаен број живеат и работат во Италија,Австрија,Швајцарија,Германија,како и мал дел во САД (Њу Џерси). Нивната подршка за културни и спортски настани во селото секогаш е на завидно ниво.