Тихомир Милошевски

Од Википедија — слободната енциклопедија
Прејди на: содржини, барај
Тихомир Милошевски (1915-1984) народен херој

Тихомир Милошевски - Тиќо (Битуше, Гостиварско, 23 јули 1915 - Скопје, 1 април 1984) — народен херој на Македонија. Бил генерал-полковник и прв командант на македонските воени единици во текот на НОВ на Македонија. Прогласен е за народен херој на 29 ноември 1953 година.

Школувањето го започнува во родното село, за да го продолжи во Тетово и Валево (Србија), каде завршува воено училиште. До почетокот на Втората светска војна работи како офицер во југословенската кралска војска. Војната ја дочекува како командир на пограничен вод во Цариброд (југословенско-бугарска граница). Тука при нападот на фашистите ќе биде и ранет.

Откако закрепнува се упатува кон Скопје, каде се приклучува кон народноослободителното движење. Поради таа негова активност набргу ќе биде и уапсен и интерниран на принудна работа во Горна Џумаја. Во јануари 1942 година е отпуштен од интернација и повторно заминува за Скопје, повторно приклучувајќи се на НОД.

Во август 1943 година се приклучува кон НОВ во Кавадаречкиот партизански одред Добри Даскалов. Учествува во Февруарскиот поход раководејќи со група баталјони, а при формирањето на Третата македонска бригада ќе биде назначен за нејзин командант. Во тоа време зема и активно учество на Првото заседание на АСНОМ, како делегат. При создавањето на првата дивизија во Македонија (41-та дивизија), ќе биде назначен за нејзин командант. Оваа дивизија под негово раководство ќе ги ослободи градовите: Прилеп, Битола, Охрид, Струга, Дебар, Кичево и др.

По ослободувањето на Македонија ќе биде назначен за командант на 48-та дивизија во состав на XV македонски корпус, кој активно учествува во пробивањето на Сремскиот фронт и кој е заслужен за ослободувањето на Винковци, Славонска Пожега, Загреб, па се до Целје. Во овие акции Милошевски ќе биде ранет во битката кај Пакрац (Хрватска).

По војната ги врши функциите на командант на дивизија, командант на наставен центар, началник на штаб на воено подрачје и др.

Се пензионира како генерал-мајор на тогашната Југословенска народна армија.