Даме Груев (населба)

Поглед на населбата (фотографирано над Скопската обиколница)

Даме Груев на картата на Општина Ѓорче Петров.

Даме Груев — населба во Скопје, на подрачјето на Општина Ѓорче Петров. Исто така овој дел од Скопје се препознава како населба Ге-Ге, и го опфаќа просторот околу улицата Лука Геров. Населбата се простира на 2,5 км² и има приближно 20 000 жители (Македонци - 80 %, Роми - 15 %, останати - 5 %). До осумдесеттите години ова место било ретко населено и било познато како „Гола Гузица“ (Ге-Ге). Главната улица (денеска „Лука Геров“) бил патот кој водел до с. Ново Село, па затоа за некои ова место било познато уште како и „Новоселски Пат“. Кон крајот на осумдесеттите и почетокот на деведесеттите значително е зголемен бројот на куќи, а подоцна и згради со што нагло се зголемува населението и се формира месна заедница, а населбата го добива името „Даме Груев“.

Бидејќи населбата е релативно нова, нејзиниот урбанистички план е модерен со прави улици хоризонтално и вертикално во налик на шаховска табла [1]. Позначајни објекти се основното училиште „Страшо Пинџур“, детската градинка „Пампурче“, касарната „Ѓорче Петров“, најновиот центар за технички преглед на возила, воениот отпад и друго. Северно од населбата поминува реката Лепенец.

Културни и природни знаменитости

Цркви

• Црква „Св. Преображение“ — главна и единствена црква во населбата. Камен-темелникот бил поставен на 5 декември 2015 година;

Археолошки наоѓалишта

• Гологузица — осамен наод, гроб на кремиран покојник од римско време