Цветово

Од Википедија — слободната енциклопедија
Прејди на прегледникот Прејди на пребарувањето
Цветово
Цветово.jpg

Поглед на селото Цветово

Цветово is located in Македонија
Цветово
Местоположба на Цветово во Македонија
Координати 41°51′29″N 21°24′34″E / 41.85806° СГШ; 21.40944° ИГД / 41.85806; 21.40944Координати: 41°51′29″N 21°24′34″E / 41.85806° СГШ; 21.40944° ИГД / 41.85806; 21.40944
Општина Coat of arms of Studeničani Municipality.png Студеничани
Население 807 жит.
(поп. 2002)
Надм. вис. 921 м
Цветово на општинската карта
Цветово во Општина Студеничани.svg

Атарот на Цветово во рамките на општината
Commons-logo.svg Цветово на Ризницата

Цветово е село во Општина Студеничани, во околината на град Скопје.

Географиja и местоположба[уреди | уреди извор]

Поглед на селото Цветово
Поглед на дел од селото Цветово

Селото Цветово се наоѓа во областа Торбешија. Поточно, Цветово се наоѓа во југозападниот дел на Скопската Котлина во горното сливно подрачје на Маркова Река во рамките на територијата на Општина Студеничани[1]. Расположено е на падината на Мокра Планина во изворишниот дел на потокот Цветовска Река, која како десна притока на Маркова Река[2] се влева во неа непосредно кај Марковиот манастир. Селото Цветово е сместено во мало седло - преслап веднаш под самиот врв наречен Пијанче (1170 м.н.в.) на огранката на Караџица и масивот Мокра која се нарекува Темна Бука. Цветово е видливо и се гледа директно во права линија од крстот на врвот на Водно. Според ваквата местоположба селото е планинско на надморска височина од 820 метри[1]. Од градот Скопје е оддалечено 33 километри[1]. Во Цветово се разликуваат главниот селски дел наречен Село кој се состои од Рамчевско, Шундевско, Рабовско, Скендеровско, Шабановско и Исовско маало и двете оддалечени маала Лениште, Стругарска Река и Рамниште основани пред 150, 85 и 102 години. Првите две се одалечени околу 1 час одење јужно од селото, поради што тоа има разбиен тип[2]. Сепак, овие оддалечени маала како Лениште или „старо Цветовo“ денес имаат по мал број на куќи во кои не живее постојано население туку само привремено престојуваат неговите жители за извршување на сточарски потреби поради зарамнетите услови на теренот и поширокото пространство. Маалата Лениште и Рамниште се наоѓаат на коњскиот и планинарските патеки кои водат кон бачилата на Празни Торба и планинарскиот дом „Караџица“ и околу нив има поила за стока. Атарот на селото Цветово зафаќа површина од 14,7 км², на кои шумите заземаат површина од 762 хектари, на пасиштата отпаѓаат 361 хектар, а на обработливото земјиште 307 хектари[1].

Историja[уреди | уреди извор]

Жителите на Цветово, кое е денес целосно македонско муслиманско село, знаат дека тоа некогаш порано било македонско православно христијанско село[2]. Доказ за тоа се пишаните турски документи од средновековиот период од XV век, односно од опширниот пописен дефтер бр. 12 од 1452/1453 година за тогашниот Скопски вилает, каде селото поради непостоење на буквата ц во арапската азбука е запишано како Исветово и во него живееле вкупно 5 македонски христијански семејства на Стајо син на Продан и неговиот брат Радош, Дабе син на Минчо и неговиот брат Рале и сиромавиот Тихомир, кои што одгледувале лозја за што остварувале приход од 515 акчиња[3]. Подоцна во XVI век, во 1544 селото имало 9 македонски христијански семејства, а во 1568 биле забележани 5 христијански семејства[3]. Муслиманите започнале да се населуваат од крајот на ХVIII век, при што христијаните почнале постепено да се иселуваат[2]. До пред околу 110-120 години во Цветово се познавала куќата на тогаш последното иселено христијанско православно семејство[2]. Од некогашното христијанско население останале некои топографски називи како името на селото, местноста Стојаново Трло итн[2]. Остатоци од старини има во местностите Дабово, Куќиште и Драгонош, северозападно од селото, каде биле изорани „старовремски гробови“ и остатоци од куќи[2]. Стари гробови биле пројандени и во местностите Рид и Цуцул, но нивните видните знаци биле растурени од мештаните со текот на времето[2]. Македонскиот просветител Јордан Хаџи-Константинов - Џинот во својот напис „Јужна страна скопска“ објавен во „Цариградски весник“ на 1 мај 1855 година забележувајќи ги природните убавини на неговата непосредна околина, за селото Цветово запишал дека е со разни полски украси и весели зеленини и има урнисани цркви[4]. Според податоците на Васил К’нчов од 1900 година, селото имало 450 жители муслимани (Македонци).[5]

Потекло, значење и предание за името[уреди | уреди извор]

Името на селото Цветово е потекло и значење на македонски јазик, кој е мајчин и говорен на жителите на селото. На името Цветово соодветствува и самата природа на околината која има изобилство на цветни ливади исполнета со најразновнидни планински цвеќиња и цветни растенија. Сепак постојат и неколку народни преданија, кои се поврзуваат со лични имиња и историскиот периодот кога во селото живееле христијани. Едно народно предание за настанокот на името забележал П.Скок, во кое се вели дека во овој крајв во дамнешното минато живееле тројца браќа Будим, Умар и Цветан кои се заселиле и ги основале селата Будилово (на атарот на Умово), Умово и Цветово кое настанало од името на Цветан[2]. Јован Трифуноски забележал две верзии на народно предание поврзано со настанокот на името Цветово. Според едната која му ја кажале местни жители на селото, таму некогаш живеела некоја жена по име Цвета од која останало името на селото[2]. Во другата верзија која ја слушнал во блиското село Добри Дол наведува дека Цвета според која селото го добило името, останала како единствен жител на селото откако „Турците“ (муслиманите) ги истерале останатите селани - христијани[2].

Стопанство[уреди | уреди извор]

Поглед на дел од селото Цветово

Според составот на селскиот атар Цветово има мешовита земјоделска функција[1]. Земјоделството е главната стопанска гранка од која се издржува населението, но поради не многу поволните услови за негов развој, значаен број на жители се занимава и со разни други дејности надвор од селото во градот Скопје и странство. Од скромните услови за поледелство најмногу се одгледува грав со добар квалитет[6], потоа тутун, кромид и многу малку стрни планински жита. Поради поволните услови во поголема мерка е развиено сточарството, односно одгледувањето крупен добиток како крави, телиња, волови, коњи и магариња за кои има бројни поила и штали на падините северно и јужно од селото. Застапено е и овчарството за кое во летниот период селани од Цветово имаат бачила на месностите Празни Торба, Бегово Поле и Салакова Планина. Главни мајстори за правење на сирење и преработка на млекото - бачови на нивните бачила се постари Македонци христијани од соседните блиски села на јужната падина на Водно - Добри Дол, Сопиште, Ракотинци и Долно и Горно Соње кои во минатото имале свои заеднички бачила на овие места[7]. Поради поволните услови Цветово е едно од неколкуте познати скопски села од овој крај кои се големи производители на јагоди, а значаен дел од жителите се занимаваат и со собирање на шумски плодови како капини, малини, шипинки и дренки кои заедно со гравот се продаваат на познати купувачи или на Зелениот пазар во Скопје[8]. Густите букови и дабови шуми на атарот јужно од селото кој се протега на падините на пределите Темна Бука, Празни Торба во поречието на Кадина Река на Караџица нудат услови дел од населението да се занимава и со шумарство и сеча на огревно дрво. Значаен дел од жителите се занимаваат и со други занаети како градежништво, плочкарство, ѕидарство, санитарија и трговија во градот Скопје, околните поголеми села и странство, пред сѐ во западна Европа.

Население[уреди | уреди извор]

Според пописот од 2002 година, селото имало население од 807 жители, од кои 805 се изјасниле како Турци и 2 други. По етничко потекло населението се Македонци-муслимани, а поради политичко-религиски причини се изјасниле како Турци.

Во 1961 година селото Цветово броело 519 жители, додека во 1994 бројот на жителите се зголемил на 847 од кои 835 се изјасниле како Турци, а 12 какo Македонци[1].

Родови[уреди | уреди извор]

Цветово e торбешко село.

Според истражувањата од 1950 година, родови во Цветово се:

  • Доселеници: Скендеровци (17 к.) доселени се од селото Жировница поради мака од Албанците. Ја знаат следната генеологија Садик (жив на 83 год. во 1950 година) Муртезан-Мустафа-Нуредин-Скендер, кој се доселил во селото пред околу 240 години; Рамчевци (20 к.) доселени се од селото Ростуша; Ибраимовци (6 к.) гранка се од родот Рамчевци; Рамбовци (15 к.) доселени се исто така од селото Ростуша, ја знаат следната генеологија Абаз (жив на 40 год. во 1950 година) Мурат-Раман-Љатиф-Раман, кој се доселил; Шундевци (10 к.) имаат потекло како и родот Скендеровци (Жировница); Шабановци (14 к.) и Исовци (18 к.) доселени се исто така од селото Ростуша; Бегалци (6 к.) доселени се од некое село во Долна Река; Реканци (3 к.), Чајланци (6 к.) и Јашаровци (3 к.) потеклото на овие родови е албанско. Првиот род е доселен од некое село во Горна Река, вториот род во е доселен од Чаја во Калиса (с. Албанија), а третиот род од селото Црн Врв, подалечно потекло од Горна Река. Мешајќи се со Торбешите го имаат примено македонскиот јазик.

Бидејќи повеќето родови во селото се доселени од селото Ростуша, населението од другите села говори дека населението на Цветово зборува по ростушки.[2]

Иселеништво[уреди | уреди извор]

Од Цветово има голем број на иселеници. Од родовитет Скендеровци (8), Рамчевци (2), Шабановци(4), Шундевци (3) и Исовци (2) има вкупно 19 семејства иселени во Скопје и Турција, додека родот Имеровци во Арачиново пред крајот на турското владеење се доселиле од Цветово[2].


Наводи[уреди | уреди извор]

  1. 1,0 1,1 1,2 1,3 1,4 1,5 Панов, Митко (1998) (на македонски). „Енциклопедија на селата во Република Македонија“. Патрија, Скопје. стр. 310. 
  2. 2,00 2,01 2,02 2,03 2,04 2,05 2,06 2,07 2,08 2,09 2,10 2,11 2,12 Ф. Трифуноски, Јован (1958) (на српски). „Слив Маркове Реке - антропогеографска проматрања“. Филозофски факултет Скопје. стр. 174-176. 
  3. 3,0 3,1 Соколоски, Методија (1976) (на македонски). Турски документи за историјата на македонскиот народ. III. Скопје: Архив на Македонија. стр. 214. 
  4. Хаџи Константинов, Јордан - Џинот. Избрани страници - приредил Блаже Конески - Скопје, Мисла, 1987 год. стр.81
  5. Кънчов, В. Македония. Етнография и статистика, София, 1900, с.209
  6. Забележал Марио Шаревски во разговор со Алит - жител на с.Цветово во август и септември 2014
  7. Забележал Марио Шаревски во разговор со бачот Павле од с.Сопиште (по потекло од Соње) и местни жители на 04.08.2014
  8. Забележал Марио Шаревски во разговор со Алит - жител на с.Цветово во август и септември 2014

Поврзано[уреди | уреди извор]

Надворешни врски[уреди | уреди извор]