Иса-бегова џамија (Скопје)

Иса-бегова џамија
Религија
Припадност	ислам
Година на осветување	1475
Локација
Локација	Скопје, Македонија
Архитектура
Тип	џамија
Стил	Османлиска архитектура
Завршена во	1475
Минаре(иња)	1

Иса-бегова џамија — џамија во Скопје, сместена на просторот северно од Султан-муратовата џамија и спроти пазариштето Бит-пазар. Според натписот кој се наоѓа над влезната врата, џамијата била изградена во 1475 година, како завештание на третиот отомански управител на Скопје, Иса-бег. Како и поголемиот број други градби во и околу чаршијата, Иса-беговата џамија претрпела големи оштетувања за време на земјотетсот во 1963 година, при што било срушено минарето. Подоцна, заедно со целата џамија, минарето било обновено.^[1]

Градбата е претставник на раната цариградска архитектура и е градена по примерот на џамијата Рум Мехмед Паша во Истанбул. Изградена е од делкан бигор и хоризонтално наредени тули, при што фасадата во горниот дел завршува со дворедни венци. Основата на џамијата зафаќа површина од 19 m² и е покриена со две големи куполи, кои пак се обложени со олово. Пред влезната врата од џамијата бил изграден трем, покриен со пет мали куполи и аркадни лакови. Во задниот дел се издига минарето, коешто е високо 34 m.^[1] На западната страна од џамијата се наоѓа дрвена врата, која содржи резба со ориентални мотиви. Во нејзината внатрешност, пак, се наоѓа саркофагот на Хазнадорат, книговодител на Иса-бег, којшто е изработен од мермер, а неговиот гроб од ќерпич.^[2]

Некогаш, во склоп на џамијата имало библиотека и медреса. Библиотеката броела повеќе од 320 различни ракописи. Според Глиша Елезовиќ,

„како по бројот на книгите, така и по нивната разновидност, оваа библиотека може да се вброи во редот на најголемите библиотеки на XV век.“^[3]

Поврзано

Скопски чинар — чинар во дворот на Иса-беговата џамија, втор чинар по старост во Македонија

Наводи

1 2 Иса-бегова џамија^{[мртва врска]}, Проект „Стара скопска чаршија“.
↑ Cultural Monuments - Isa Bey Mosque^{[мртва врска]}, Skopje Online.
↑ Г. Елезовиќ: „Турски споменици у Скопљу XXX“, Гласник Српског Научног Друштва, кн. 7-8, бр. 3-4, Скопје, 1930., стр.167-168.

Галерија

Предниот дел
Внатрешноста на џамијата
Гробишта во џамискиот двор
Шадрванот
Разгледница од Скопје, Иса-бегова џамија, од 1930-те година

[Иса-бегова_џамија-1] 1 2 Иса-бегова џамија^{[мртва врска]}, Проект „Стара скопска чаршија“.

[2] Cultural Monuments - Isa Bey Mosque^{[мртва врска]}, Skopje Online.

[3] Г. Елезовиќ: „Турски споменици у Скопљу XXX“, Гласник Српског Научног Друштва, кн. 7-8, бр. 3-4, Скопје, 1930., стр.167-168.

[1]

[2]

[3]