Дримкол

Од Википедија — слободната енциклопедија
Прејди на прегледникот Прејди на пребарувањето
За други значења на поимот Дримкол, видете на појаснителната страница

Дримкол — етногеографски предел во југозападниот дел на Македонија, на границата со Албанија. Името го добил од реката Дрим и турскиот збор „кол“ што значи „одред“, „војска“ или „стража“, „жупа“.[1]

Географски карактеристики[уреди | уреди извор]

Се простира на запад од реката Црни Дрим, по источните страни на планината Јабланица. На југ допира до брегот на Охридското Езеро, а на север до Дебарска Жупа. Се дели на Струшки или Горни Дримкол[2] на југ и Дебарски или Долни Дримкол[2] на север. Струшкиот Дримкол е поголем и се шири на дел од Струшко Поле, а дебарски Дримкол е планинско-ридест крај. Покрај источната периферија на двата Дримкола води регионален пат кој го поврзува пределот на север со Дебар и на југ со Струга. На запад, од Струга преку Ќафасан, води меѓународен пат кој го поврзува со Албанија. Во Дримколската Клисура се изградени две вештачки акумулации, Глобочица и Шпилје, на кои се подигнати и две електроцентрали. Кај селото Пискупштина е откриен јаглен со резерви од околу 3,5 милиони тони и тој се експлоатира. Главно занимање на дримколци во Струшко Поле е земјоделството, а во јабланичките села сточарството. Значаен дел од населението е заминато на привремена работа во странство.[3]

Населени места и население[уреди | уреди извор]

Традиционална дримколска архитектура - Куќа во село Вевчани

Во Дримкол има 23 села, од кои 15 се во Струшки, а 8 во Дебарски Дримкол. Главно административно и стопанско средиште на Дримкол е Струга.

Струшки Дримкол: Боровец, Вевчани, Велешта, Враниште, Вишни, Горна Белица, Долна Белица, Добовјани, Заграчани, Калишта, Лабуништа, Октиси, Подгорци, Радолишта, Шум.

Дебарски Дримкол: Јабланица, Безово, Дренок, Лакаица, Луково, Модрич, Нерези, Пискупштина.

Најголемо село е Лабуништа, со 5.936 ж. (2002 год.), додека селото Вевчани е самостојна општина. Населението го составуваат Македонци, Македонци муслимани (Торбеши) и Албанци, кои се поделени на Геги и Тоски.

Вкупното население на Дримкол според последниот попис од 2002 година претставува 30 269 жители, од кои 28 790 живеат во Струшки, а само 1 479 во Дебарски Дримкол.

Наводи[уреди | уреди извор]

  1. Pianka, Włodzimierz (1970) (на македонски). Топономастиката на Охридско-преспанскиот базен. Institut za makedonski jazik "Krste Misirkov". 
  2. 2,0 2,1 Поповски, Јован; Душко Наневски (1971) (на македонски). Дримколски Записи. Македонска книга. 
  3. М. Филиповић, Дебарски Дримкол, Скопље, 1939