Бојан Маричиќ

Од Википедија — слободната енциклопедија

Бојан Маричиќ (роден на 7 јануари 1983 година во Скопје) — македонски политичар и заменик на претседателот на Владата за европски прашања.

Во 2006 година, дипломирал на Правен факултет „Јустинијан I“ - Скопје, отсек меѓународни односи. Како стипендист на МТЕК програмата на Кралството Холандија, во 2009 година, Маричиќ магистрирал по Меѓународно и европско право на Универзитетот во Амстердам, додека пак во 2011 година, како стипендист на Чивнинг програмата на Министерството за надворешни работи на Обединетото кралство, Маричиќ магистрирал по Современи европски студии на Универзитетски колеџ (Оксфорд).

Маричиќ бил демонстратор на Правен факултет „Јустинијан I“ - Скопје речиси две години, од ноември 2006 година до септември 2008 година.

Во меѓувреме, од февруари 2007 година до август 2008 година, Маричиќ работел во Секторот за правни и кадровски работи на Министерството за внатрешни работи на Македонија, како проектен асистент на проект за приближување на европското законодавство.

Во периодот септември 2009 - септември 2010 година, Маричиќ бил проектен координатор и аналитичар во правната програма, програмата за јавна администрација и ЕУ програмите во Фондацијата отворено општество – Македонија.

Од септември 2011 до ноември 2013 година, Маричиќ ја продолжува својата кариера во Евротинк - Центар за европски стратегии, најпрвин како Виш истражувач за правни и политички прашања, а од номври 2013 година до јуни 2017 година, како извршен директор на оваа невладина организација.

Од јуни 2017 година до јануари 2020 година, Маричиќ работел како Посебен советник за евроатлантски интеграции на Претседателот на Владата на Македонија, Зоран Заев. Паралелно, Маричиќ е назначен и за Национален шерпас за Берлинскиот процес, а од јули 2018 година, тој е именуван и за Заменик на главниот технички преговарач, Главен технички преговарач и  Шеф на техничкиот преговарачки тим за пристапување на Македонија кон Европската унија.

Од јануари 2020 година до септември 2020 година, во Владата на Македонија, Маричиќ е назначен за Национален координатор за интеграција во Европската Унија, Берлински процес и регионална соработка.[1]

Маричиќ претходно ја вршел функцијата министер за правда.

Наводи[уреди | уреди извор]

  1. „Бојан Маричиќ“. Влада на Македонија. 2020-08-31. Посетено на 2022-07-24.

Надворешни врски[уреди | уреди извор]