Владимир Талески

Од Википедија — слободната енциклопедија
Владимир Талески
Градоначалник на Општина Битола
На должноста
2005 – 2017
Претходник Златко Вршковски
Наследник Наташа Петровска
Лични податоци
Роден(а) 7 март 1959(1959-03-07)(65 г.)
Кичево, СР Македонија
Партија ВМРО-ДПМНЕ
Деца 2
Установа Филозофски факултет - Скопје
Факултет за драмски уметности - Скопје
Професија актер
Вероисповед Православен христијанин

Владимир Талески (роден на 7 март 1959 во Кичево) — македонски актер и градоначалник на Општина Битола од 2005 до 2017 година.

Животопис[уреди | уреди извор]

Владимир Талески е роден на 7 март 1959 година, во Кичево. Се запишал на Филозофскиот факултет во Скопје, на отсекот психологија во 1977 година. Но, дипломирал на Факултетот за драмски уметности во Скопје како глумец, во 1983 година. Во 2000 година специјализирал театарска режија на Националната академија за театарска и филмска уметност во Софија, Бугарија. Талески е оженет и татко на две деца.[1]

Глумечка кариера[уреди | уреди извор]

Од своето дипломирање во 1983 година, па сѐ до избирањето за градоначалник на Битола во 2005 година, Талески работел како глумец во Битолскиот народен театар. Притоа, тој играл голем број главни улоги во дела од светски и домашни автори, како: Шекспир, Софокле, Горан Стефановски, Антон Панов, Јордан Плевнеш и други. Така, тој ја играл насловната ролја во „Хамлет“ од Шекспир; гостувал на „Мала Брона“ во Москва, бил учесник на „Дубровнички летни игри“ со претставата „Лир“ од Едвард Бонд, како самостоен проект на фестивалот; а во 1998 година бил учесник во проектот „Landscape X - part Eurelien“ во Стокхолм, со претставата „Alien Busters“ на Горан Стефановски. Исто така, учествувал на повеќе театарски фестивали: „Месс“ во Сараево, „Стериино позорје“ во Нови Сад, „Еуроказ“ во Загреб, „Интернационален фестивал“ во Љубљана, „Охридско лето“ во Охрид, „МОТ“ во Скопје, „Будва - фест“ во Будва, „Алтернативен театар“ во Подгорица, „Фестивал на детето“ во Шибеник, „Војдан Чернодрински“ во Прилеп, „Ристо Шишков“ во Струмица, и други. Се занимавал и со пишување на текстови за театарски претстави и сценарија за телевизиски претстави.

Талески има релизирано голем број телевизиски емисии и серии за различни редакции. Настапувал во телевизискиот филм „Мугра“, како и во играните филмови „Јужна патека“, „Хај-фај“ и „Тајната книга“. Покрај тоа, тој има режирано 12 театарски претстави, 7 документарни филмови и повеќе новогодишни претстави за деца, промотивни и други музички манифестации. Исто така, Талески се појавил во културно-образовните емисии за млади „Црвено, жолто, зелено“, играјќи го ликот на студентот Диме и во „Здраво генијалци“ играјќи го ликот на забавниот Двојче. За својата професионална работа има добиено повеќе награди и признанија, како: наградите „Војдан Чернодрински“ (трипати) и „4 Ноември“ (двапати).

Обвинувања за корупција[уреди | уреди извор]

Во април 2016 година, Специјалното јавно обвинителство (СЈО) го отворило предметот „Транспортер“ во кој го сомничи Талески и вработени во општината за криминал со организирање превоз на ученици од основни и средни училишта во Битола за 10 пати повисока цена од реалната. СЈО проценило дека Талески го оштетил буџетот на општината за 360 илјади евра и побарало мерка притвор за градоначалникот. Судијата на претходна постапка во јуни определил 90-дневен куќен притвор за Талески.[2]

Наводи[уреди | уреди извор]

  1. „Биографија“. Архивирано од изворникот на 2013-03-07. Посетено на 2013-03-18.
  2. Зоран Милошески, „Куќниот притвор - казна или награда за битолскиот градоначалник?“, Фокус, број 1112, 27 јанауари 2017, стр. 35-37.
Политички функции
Претходник
Златко Вршковски
Градоначалник на Општина Битола
2005–2017
Наследник
Наташа Петровска