Кривогаштани

Од Википедија — слободната енциклопедија
Кривогаштани

Поглед на селото

Кривогаштани во рамките на Македонија
Кривогаштани
Местоположба на Кривогаштани во Македонија
Кривогаштани на карта

Карта

Координати 41°20′9″N 21°19′59″E / 41.33583° СГШ; 21.33306° ИГД / 41.33583; 21.33306Координати: 41°20′9″N 21°19′59″E / 41.33583° СГШ; 21.33306° ИГД / 41.33583; 21.33306
Регион  Пелагониски
Општина  Кривогаштани
Област Прилепско Поле
Население 1.533 жит.
(поп. 2021)[1]

Пошт. бр. 7524
Повик. бр. 048
Шифра на КО 20053, 20553
Надм. вис. 607 м
Кривогаштани на општинската карта

Атарот на Кривогаштани во рамките на општината
Кривогаштани на Ризницата

Кривогаштани — село и административно седиште на истоимената општина, во околината на градот Прилеп. Селото се наоѓа на двете страни на регионалниот пат 1306 помеѓу градовите Прилеп и Крушево.

Потекло и значење на името[уреди | уреди извор]

Народните преданија говорат за две легенди поврзани за името на селото Кривогаштани.

Според првата легенда, селото Кривогаштани, своето име го добило по некогашниот град, кој бил во непосредна близина на денешната населба, а се викал Крив Град. Градот се одликувал со криви, долги и тесни улички низ кои жителите, пред своите куќи, си ги сушеле „гаштите“, односно алиштата што ги носеле.

Втората легенда зборува дека жителите од Кривогаштани ги носеле своите „гашти“ (панталони) накриво, па поради тоа жителите од околните населби им се потсмевале, викајќи ги кривогаштанци. Интересно е да се напомене дека и денес жителите од некои соседни села не велат Кривогаштани и кривогаштанци туку „Кривограждани“ и „Кривогражданци“, што пак се поврзува со средновековниот Крив Град.

Географија и местоположба[уреди | уреди извор]

Парк пред општинското седиште

Селото е едно од поголемите села во Прилепското Поле, коешто лежи на неговиот краен западен дел, сместено на регионалниот пат 1306 помеѓу градовите Прилеп и Крушево. Неговиот атар се допира со подрачјето на Општина Крушево. Селото претставува административно седиште на истоимената општина.[2] Селото е рамничарско, на надморска височина од 607 метри. Од градот Прилеп е оддалечено 20 километри,[2] додека од градот Крушево е оддалечено 11 километри, со што селото претставува вистинска раскрсница. Јужно од селото води асфалтен пат и за градот Демир Хисар, кој поминува низ повеќе села, додека на север води асфалтен пат кон селото Ропотово, од каде продолжува кон градот Македонски Брод.

Кривогаштани е големо и познато село во околината на Прилеп. Се наоѓа во западниот дел на Пелагонија. Околни села се Врбоец, Кореница, Свето Митрани, Крушеани и други. Низ селото поминува малата Крушевска Река.[3] На запад од Кривогаштани е Бушева Планина, а на југ, исток и север се простира Пелагонија.

Месностите во атарот ги носат следниве имиња: Ливади, Воденичиште, Коритница, Тумба, Крајни Рид, Градиште, Различиште, Млечеј, Шумковец и други.[3]

Селото има збиен тип, составено од следниве делови: Карафиловци, Мојсовци, Кочоперовци, Рујановци и други. Имињата на овие делови се од главните родови.[3]

Клима[уреди | уреди извор]

Станбена зграда
Парк во Кривогаштани

Климата, како и во целата Пелагониска рамница, па така и во Кривогаштани е изменето средоземна. Врнежите се движат од 700 до 900 милиметри воден талог во текот на годината. Тие се најинтензивни во пролет и есен, а првиот снег обично паѓа кон крајот на ноември или во почетокот на декември. Ветровите дуваат во текот на целата година, но најинтензивно во пролет и есен.

Флора и фауна[уреди | уреди извор]

Во непосредна близина на Кривогаштани, а особено на источната страна, кај Крајни Рид, Петочна Ричка, Градиште, Манастириште и Лозје доста е богато со животински свет, а најзастапен е ситниот дивеч: зајак, лисица, ласица и повеќе влекачи. А на источната страна, односно во областите кај реката Блато, околу која се наоѓаат областите Солунов Даб, Чаир и Ливаѓе има поголем број видови на птици како што се дивите гуски, дивите гулаби, дивите пајки, еребици и друго. Во самата населба се среќаваат цели јата на диви гулаби, чавки, гугутки, врапци, штркови, ластовици, а посебно внимание привлекуваат сивите чапји кои се населени на стариот даб во црквата „Св. Димитриј“, која се наоѓа во средишниот дел на селото. Сивите чапји доаѓаат во почетокот на март, а си одат во август.

Историја[уреди | уреди извор]

Траги од старини се наоѓаат на месноста Градиште недалеку од селото. Таму биле наоѓани врчви, стари пари и друго. Такви остатоци биле наоѓани и на месноста Крајни Рид, каде денес има лозја.[3]

Западно од селото се наоѓа месноста Манастириште, каде според народната традиција некогаш имало стар христијански храм. Тој бил срушен пред 150 години од Албанците муслимани. Тој храм се верува дека се викал „Св. Илија“ и бил подигнат во средновековниот период.[2] На патот за соседното село Пресил се гледаат остатоци на стари гробови, каде во близина се наоѓа обновената црква „Воведение на Пресвета Богородица“.[3]

Кривогаштани е старо село, што се гледа од зачуваните македонски родови. Селото е споменато како Кривогаштанех во грамота на царот Стефан Душан за манастирот Трескавец во 1337 година.[3]

Во текот на XIX век со доселување станало прилично големо македонско село. Во овој период во Кривогаштани постоеле четири чифлици, а нивни сопственици биле: Саид-паша, Адем-ага, Устреф-ага и Демчо-ага. Саид-паша бил сопственик и на еден ан во Кривогаштани.[3]

Стопанство[уреди | уреди извор]

Атарот зафаќа простор од 14,9 км2. На него преовладуваат обработливите површини на површина од 1.215 хектари, на пасиштата отпаѓаат 315 хектари, додека шумско земјиште нема.[2]

Селото, во основа, има полјоделска функција. Во селото имало земјоделска задруга, има фабрички погони, услужни и угостителски објекти.[2]

Во Кривогаштани се наоѓа еден од најголемите сточни пазари во Македонија.[4]

Како култура во минатото во Кривогаштани во голема мера бил застапен и конопот, од кој се произведувале конопни влакна, кои во најголем дел се продавале на пазарот во Прилеп за потребите на ортомџиите, а помал дел ги користеле и самите жители за производство на ортоми, сиџими, огламници, па и постилачи за под, а и покривачи.[5]

Население[уреди | уреди извор]

Население во минатото
ГодинаНас.±%
19481.913—    
19532.288+19.6%
19612.366+3.4%
19712.380+0.6%
19812.356−1.0%
ГодинаНас.±%
19912.191−7.0%
19941.950−11.0%
20021.870−4.1%
20211.533−18.0%
Дефилето на манифестацијата „Денови на македонската народна носија“, која секоја година се одржува во Кривогаштани

Според статистиката на бугарскиот етнограф Васил К’нчов од 1900 година, во селото Кривогаштани живееле околу 860 жители, сите Македонци.[6] Според егзархискиот секретар Димитар Мишев, („La Macédoine et sa Population Chrétienne“) во 1905 година во Кривогаштани имало имало 680 Македонци, под врховенството на Бугарската егзархија и 240 Македонци патријаршисти.[7]

На Етнографската карта на Битолскиот Вилает од 1901 г. Кривогаштани се води како чисто македонско село во Прилепската каза на Битолскиот санџак со 123 куќи.[8]

Според германска карта издадена во 1941 година, а заснована на пописот на Кралството Југославија од 1931 година, селото имало 1.300 Македонци.[9]

Кривогаштани е големо село, коешто во 1961 година имало 2.366 жители, од кои 2.356 биле Македонци, четворица Срби и двајца жители Хрвати. Во 1994 година селото броело 1.950 жители, од кои 1.947 биле Македонци.[2]

Според пописот од 2002 година, во селото Кривогаштани живееле 1.870 жители, од кои 1.860 Македонци, 8 Роми, 1 Србин и 1 останат.[10]

Според последниот попис од 2021 година, во селото живееле 1.533 жители, од кои 1.493 Македонци, 2 Албанци, 1 Влав, 7 Срби, 4 останати и 26 лица без податоци.[11]

Во табелата во продолжение е направен преглед на населението во сите пописни години:

Година 1900 1905 1948 1953 1961 1971 1981 1991 1994 2002 2021
Население 860 920 1.913 2.288 2.366 2.380 2.356 2.191 1.950 1.870 1.533
Извор за 1900 г.: Македонија. Етнографија и статистика.[12]; за 1905 г.: La Macédoine et sa Population Chrétienne.[13]; за 1948-2002 г.: Државен завод за статистика на РМ.[14]; за 2021 г.: Државен завод за статистика на РМ.[15]

Родови[уреди | уреди извор]

Кривогаштани е чисто македонско село. Селото е многу старо и во него има зачувано староседелски родови.[3]

Според истражувањата на Јован Трифуноски во 1952 година родови во селото се:

  • Староседелци: Мојсовци (18 к.), Карафиловци (17 к.), Кочоперовци (17 к.), Папушковци (15 к.), Пологовци (9 к.), Митровци (8 к.), Путевци (6 к.), Џаферовци (5 к.), Чуриновци (5 к.) и Василевци (2 к.).
  • Родови доселени во ХVIII век: Везенковци (8 к.), доселени се од некое село Везенково во околината на Охрид; Рујановци (12 к.), доселени се од некое село во Охридско; Чавковци (10 к.), доселени се од Кичевско, најпрво се населиле во Годивле, а потоа дошле во Кривогаштани; Рикаловци (10 к.), доселени се од селото Единаковци, Железник; Бараковци (8 к.), доселени се од селото Бараково; Киселовци (14 к.), Станчевци (10 к.), Бурмузовци (8 к.), Корковци (8 к.), Лукаревци (7 к.) и Тркалевци (6 к.), се доселеници со непозната старина.
  • Родови доселени во XIX век и подоцна: Поповци (3 к.), доселени се од поречкото село Крапа, основачот на родот бил свештеник; Житошанци (6 к.), доселени се од селото Житоше; Базеровци (6 к.), доселени се од селото Годивле, нивниот доселен предок овде имал околу 100 кози; Џуцуловци (10 к.), Чорбевци (6 к.), Смутковци (6 к.), Коруновци (4 к.), Голевци (4 к.), Здравковци (6 к.), Клекачовци (4 к.), Комицовци (3 к.), Мојановци (3 к.), Пупуновци (3 к.), Рогушковци (2 к.), Амбаровци (2 к.) и Булдиновци (1 к.), се доселеници со непозната старина.

Иселеништво[уреди | уреди извор]

Се знае за следните постари иселени родови од ова село. Родовите Ангелевци и Нешковци иселени се во селото Врбоец, Китановци и Киселовци иселени се во селото Обршани, Милевци иселени се во селото Бистренци, Патлиџановци и Придаеновци иселени се во селото Крушеани, Кривогавци иселени се во селото Новоселани, Ѕвездаковци иселени се во селото Кореница, Јолбашевци иселени се во градот Прилеп и други.[3]

Општествени установи[уреди | уреди извор]

  • Општина Кривогаштани
  • Основно училиште „Манчу Матак“, централно деветгодишно основно училиште
  • Градинка „Весело Штркче“
  • Пошта (7524)
  • Јавно комунално претпријатие „Пелагонија“
  • Полициска станица
  • Амбуланта
  • Ветеринарна станица
  • Дом на културата

Самоуправа и политика[уреди | уреди извор]

Во XIX век, Кривогаштани било село во Прилепската каза на Отоманското Царство.

Селото влегува во рамките на Општина Кривогаштани, која била една од ретките општини во Македонија која не била изменета при територијалната поделба во 2004 година. Во периодот од 1996-2004 година, селото било седиште на тогашната Општина Кривогаштани.

Во периодот од 1955 до 1996 година, селото се наоѓало во рамките на големата општина Прилеп.

Во периодот 1952-1955, селото било седиште на тогашната Општина Кривогаштани, во која покрај селото Кривогаштани, се наоѓале и селата Врбоец, Годивле, Кореница, Крушеани, Локвени, Милошево, Свето Митрани и Подвис. Во периодот 1950-1952, селото било седиште на некогашната Општина Кривогаштани, кога во нејзе се наоѓале селата Кривогаштани и Крушеани.

Избирачко место[уреди | уреди извор]

Во селото постојат избирачките места бр. 1510 и 1511 според Државната изборна комисија, сместени во просториите на приватен објект и основното училиште.[16]

На претседателските избори во 2019 година, на ова избирачко место биле запишани вкупно 1.466 гласачи.[17] На локалните избори во 2021 година, на ова избирачко место биле запишани вкупно 1.464 гласачи.[18]

Културни и природни знаменитости[уреди | уреди извор]

Археолошки наоѓалишта[3][19]
Цркви[20]
Споменици
  • Споменик во чест на НОБ.[2]
  • Биста на народниот херој Манчу Матак во дворот на основното училиште
  • Крале Марков Камен — камен за кој се верува дека го фрлил Крале Марко

Редовни настани[уреди | уреди извор]

Во Кривогаштани секоја година во март се одржува манифестацијата „Денови на македонската народна носија“. На манифестацијата која е од ревијален и натпреварувачки карактер учествуваат културно-уметнички друштва од цела Македонија.

Личности[уреди | уреди извор]

Родени во или по потекло од Кривогаштани

Култура и спорт[уреди | уреди извор]

Новата банкнота на македонскиот денар од апоен во вредност од 2.000 денари содржи кривогаштанска невестинска носија изработена врз основа на цртеж на руската сликарка Олга Бенсон.[24]

Во селото работи фудбалскиот клуб „Младост“.

Галерија[уреди | уреди извор]

Наводи[уреди | уреди извор]

  1. „Пописна слика на населените места во Македонија, Попис 2021“. Државен завод за статистика. Посетено на 22 декември 2022.
  2. 2,0 2,1 2,2 2,3 2,4 2,5 2,6 Панов, Митко (1998). Енциклопедија на селата во Република Македонија (PDF). Скопје: Патрија. стр. 163. Посетено на 7 јануари 2022.
  3. 3,00 3,01 3,02 3,03 3,04 3,05 3,06 3,07 3,08 3,09 Трифуноски; Јован Ф. (1998). Bitoljsko-Prilepska kotlina: antropogeografska proučavanja. Белград: Српска академија на науките и уметностите. ISBN 8670252678. OCLC 41961345.
  4. Ристовски, Блаже, уред. (2009). „Пазарна“. Македонска енциклопедија. , книга II (М-Ш). Скопје: МАНУ. стр. 1105. Text "series " ignored (help)
  5. Ристевски, Љупчо (1992). „Начинот и производството на конопот и неговото значење за културното живеење на с. Кривогаштани“. Етнолог. Здружение на етнолозите на Република Македонија - Музеј на Македонија (2): 208–220.
  6. Васил К’нчов. „Македонија. Етнографија и статистика“. Софија, 1900, стр. 244.
  7. Brancoff, D.M. "La Macédoine et sa Population Chrétienne". Paris, 1905, р. 148-149.
  8. Михајловски, Роберт, уред. (2017). Етнографска карта на Битолскиот вилает (PDF). Каламус. стр. 21.
  9. „200K Volkstumskarte Jugoslawien“.
  10. „Попис на Македонија“ (PDF). Завод за статистика на Македонија. 2002. Посетено на 7 јануари 2022.
  11. „Оваа категорија опфаќа лица коишто учествуваат во вкупното резидентно население, но поради нивно одбивање да бидат попишани, неможност да бидат најдени на својата адреса на живеење и непотполност во работата на попишувачите не биле официјално попишани, туку за нив податоците биле преземени од административни извори и затоа не учествуваат во изјаснувањето за етничка припадност, вероисповед и мајчин јазик (Прочитајте повеќе...).“
  12. К’нчов, Васил. „Македонија. Етнографија и статистика“. Софија, 1900
  13. Brancoff, D.M. „La Macédoine et sa Population Chrétienne“. Paris, 1905.
  14. „Население по возраст и по пол, по населени места, според пописите спроведени во Република Македонија по Втората светска војна“. Државен завод за статистика.
  15. „Вкупно резидентно население на Република Северна Македонија според етничката припадност, по населени места, Попис, 2021“. Државен завод за статистика.
  16. „Описи на ИМ“. Архивирано од изворникот на 2023-08-17. Посетено на 3 ноември 2019.
  17. „Претседателски избори 2019“. Архивирано од изворникот на 2019-12-29. Посетено на 3 ноември 2019.
  18. „Локални избори 2021“. Архивирано од изворникот на 2021-12-02. Посетено на 7 јануари 2022.
  19. Грозданов, Цветан; Коцо, Димче; и др. (1996). Археолошка карта на Република Македонија. Т. 2. Скопје: МАНУ. стр. 301. ISBN 9989-649-28-6.
  20. Јелена Павловска, Наташа Ниќифоровиќ и Огнен Коцевски (2011). Валентина Божиновска (уред.). Карта на верски објекти во Македонија. Менора - Скопје: Комисија за односи во верските заедници и религиозните групи. ISBN 978-608-65143-2-7.
  21. . Јасмина Дамјановска, Ленина Жила и Филип Петровски (2016). Илинденски сведоштва. том II, дел I. Скопје: Државен архив на Република Македонија. Отсутно или празно |title= (help)CS1-одржување: друго (link)
  22. . Јасмина Дамјановска, Ленина Жила и Филип Петровски (2017). Илинденски сведоштва. том III, дел II. Скопје: Државен архив на Република Македонија. Отсутно или празно |title= (help)CS1-одржување: друго (link)
  23. . Јасмина Дамјановска, Ленина Жила и Филип Петровски (2017). Илинденски сведоштва. том IV, дел I. Скопје: Државен архив на Република Македонија. Отсутно или празно |title= (help)CS1-одржување: друго (link)
  24. „Банкнотата од 2000 денари носија од Кривогаштани“. zemjodelie.mk. 28 декември 2020. Посетено на 7 јануари 2022.

Поврзано[уреди | уреди извор]

Надворешни врски[уреди | уреди извор]