Return of the Obra Dinn

Return of the Obra Dinn
Издавач(и)	3909 LLC.
Дизајнер(и)	Лукас Поуп
Уметник(ци)	Лукас Поуп
Погон	Unity
Подлоги	macOS Windows Nintendo Switch PlayStation 4 Xbox One
Датум на издавање	macOS, Windows 18 октомври 2018 г. Switch, PS4, Xbox One 18 октомври 2019 г.
Жанр(ови)	авантуристичка, загатка
Режим(и)	едноиграчки

Return of the Obra Dinn (македонски: Враќањето на Обра дин) — авантуристичка игра развиена и издадена од играчкиот дизајнер Лукас Поуп во 2018 г. за Windows и MacOS. Ова е втора трговска игра на Поуп, по Papers, Please, од 2013 г. Играта се одвива на измислениот призрачен брод „Обра дин“, кој се вратил во домашното пристаниште без екипаж и патници неколку години по неговото таинствено исчезнување. Играчот, во улога на осигурителен истражител за Британската источноиндиска компанија, мора да ја одреди судбината на секој од шеесетте луѓе на бродот — местото и околностите на нивната смрт или исчезнување. Играта користи еднобитен еднобоен графички стил вдахнат од игрите на раните системи Macintosh. Return of the Obra Dinn добил исклучително високо признание од критичарите и бил удостоен со неколку награди во играчката индустрија, како и постојано прогласуван за една од најдобрите игри на годината и деценијата.

Содржина

Трговскиот брод „Обра дин“ (англ. The Obra Dinn), под заповед на капетанот Роберт Витерел, во 1802 г. испловува со 52 члена на екипажот и 8 патници од Фалмут, Корнвол, кон Ориент. Бродот не успева да стигне до собирното место кај ’Ртот на Добрата Надеж и е прогласен за исчезнат. Пет години подоцна, бродот ненадејно повторно се појавува покрај брегот на Англија, со сите души мртви или исчезнати. Британската источноиндиска компанија испраќа новоименуван „Главен инспектор“ за да утврди што се случило на бродот. Инспекторот добива примерок од дневникот на „Обра дин“, цртежи на патниците и екипажот, како и „Memento Mortem“ од Хенри Еванс, бродскиот хирург. „Мортемот“, кога се користи на труп или негови траги, му овозможува на корисникот да го набљудува точниот миг на смртта на трупот, замрзнат во времето. Со ова и со дневникот, инспекторот се зафаќа да ја расветли судбината на сите 60 души на бродот.

„Обра дин“ превезувал голем број патници, вклучувајќи патувачки музичар, богата Англичанка со нејзината придружничка, и двајца формосански благородници со нивните чувари што превезувале извонреден ковчег со богатство. Првата несреќа се случила само неколку дена по почетокот на пловидбата, кога еден член на екипажот и еден шверцер биле згмечени до смрт од необезбеден товар, а други двајца починале од пневмонија и покрај најдобрите обиди на Еванс да ги спаси.

Кратко по пристигнувањето на Канарските Острови, вториот офицер на „Обра дин“, Едвард Николс, се обидува да го украде ковчегот на формосанските благородници во товарниот простор, кога музичарот го фаќа на дело; Николс го прободува и го наместува еден од формосанските чувари. Витерел, обврзан да ги почитува прописите на Компанијата, наредува човекот да биде погубен од стрелачки вод. Николс потоа организира мала група мажи да го украдат ковчегот и да ги земат благородниците како заложници на два од бродските чамци. Три сирени потоа ги напаѓаат чамците, убивајќи го поголемиот дел од групата. Нападот на сирените е запрен само кога еден од благородниците користи волшебна школка извлечена од ковчегот за да ги зашемети сирените, по цена на сопствениот живот. Николс ги врзува чамците и се враќа на „Обра дин“ заедно со заробените сирени, само за да биде смртно застрелан од преживеаниот формосански чувар додека се приближува. Кога се донесени на бродот, сирените, кои имаат свои школки, беснеат и убиваат неколку членови на екипажот пред да бидат безбедно заклучени во лазаретот.

Капетанот Витерел наредува бродот да се врати во Англија. Сирените користат волшепство за да повикаат страшна бура, дозволувајќи пар морски демони качени на џиновски пајакови ракови да се обидат да ги спасат. Демоните се убиени, но екипажот претрпува тешки загуби. Кратко потоа, сирените повикуваат кракен, кој убива повеќе членови на екипажот и сериозно го оштетува бродот. Капетанот, откако ја сфатил вистината, оди во лазаретот и убива две од сирените пред третата да го испрати кракенот. Преживеаната сирена е ослободена, но дури откако се согласува да го води бродот назад кон дома. Преживеаните патници и дел од екипажот одлучуваат да го напуштат „Обра дин“ и да се упатат кон западниот брег на Африка, но само Еванс и неговиот чамец стигнуваат на безбедно. Пред да замине, Еванс го убива своето милениче мајмун во лазаретот и ја задржува неговата шепа. Малата група преживеани, кои сѐ уште се на бродот, постепено се свртуваат еден против друг, пред конечно да се обидат да го преземат управувањето над бродот преку бунт.

Витерел успева да ги убие сите во борба еден на еден, но бидејќи неговата жена веќе е мртва од повредите здобиени за време на нападот на кракенот, тој извршува самоубиство со пиштол.

Инспекторот на крајот ги каталогизира судбините на 58 од 60-те души на бродот, заминувајќи кратко пред ненадејна бура да го потопи оштетениот „Обра дин“. Целосниот дневник е испратен назад до Еванс, а изготвен е извештај за осигурување, со кој се обесштетуваат или казнуваат имотите на изгубените членови на екипажот, во зависност од нивното поведение. Една година подоцна, Џејн Бирд, една од преживеаните што побегнале со Еванс, ја испраќа книгата назад до инспекторот заедно со шепата од мајмунот и писмо во кое пишува дека Еванс починал кратко по добивањето на дневникот. Инспекторот го користи „Мортемот“ на шепата од мајмунот за да заклучи што се случило во лазаретот и да ги каталогизира последните две судбини, со што ја завршува целата приказна на „Обра дин“ за негова лична колекција.

Надворешни врски

• Return of the Obra Dinn на Семрежната филмска база на податоци (англиски)

• Матична страница