Квалитативна неорганска анализа

Квалитативната неорганска анализа го анализира присуството на некој хемиски елемент или неорганско соединение во еден примерок за анализа.

Идентификација на катјони

1ва аналитичка група на катјони

Во 1вата аналитичка група на катјони спаѓаат: Ag⁺, Hg2+
2 и Pb²⁺. Во реакција со групниот реагенс, хлороводородна киселина обично со концентрација од 1–2 M, се таложат како хлориди, кои се нерастворливи во вода.

2ра аналитичка група на катјони

Во 2рата аналитичка група на катјони спаѓаат: Cd²⁺, Bi³⁺, Cu²⁺, As³⁺, As⁵⁺, Sb³⁺, Sb⁵⁺, Sn²⁺, Sn⁴⁺ и Hg²⁺. Во реакција со групниот реагенс, сулфуроводородна киселина, се таложат како сулфиди.

3та аналитичка група на катјони

Во 3та аналитичка група на катјони спаѓаат: Fe²⁺, Fe³⁺, Al³⁺ и Cr³⁺. Во реакција со групниот реагенс, амониум хидроксид, се таложат како нерастворливи хидроксиди. Реакцијата се изведува на pH од 8–9, што се постигнува со додавање на пуферски раствор.

4та аналитичка група на катјони

Во 4та аналитичка група на катјони спаѓаат: Zn²⁺, Ni²⁺, Co²⁺ и Mn²⁺. Во реакција со групниот реагенс, амониум сулфид во базна средина, се таложат како слабо растворливи сулфиди.

5та аналитичка група на катјони

Во 5та аналитичка група на катјони спаѓаат: Ba²⁺, Ca²⁺ и Sr²⁺. Во реакција со групниот реагенс, амониум карбонат во базна средина, се таложат како карбонати.

6та аналитичка група на катјони

Катјоните кои остануваат после внимателно одделување на претходните групи се вбројуваат во шеста аналитичка група. Тука спаѓаат: Mg²⁺, Li⁺, Na⁺ и K⁺.