Димитар Мирчев

Димитар Мирчев е македонски универзитетски професор, публицист и политиколог. Роден во 1942 година. Дипломирал на Правниот факултет во 1966 година на Универзитетот во Белград (политичко-управна насока), магистрирал на политички науки во 1971 год. на Универзитетот “Св. Кирил и Методиј”, Скопје, а со титулата доктор од политички науки се здобива на Универзитетот во Љубљана во 1977 год. Специјализација: Методологија на општествени истражувања на Универзитетот во Брадфорд, ВБ, 1969-1971 г. Пост-докторска специјализација: Јавна политика и меѓународни односи, Универзитет во Питсбург, САД, 2003-2004 година. Димитар Мирчев бил редовен професор по политичка социологија и политички систем на Филозофскиот факултет во Скопје и Проректор на Универзитетот "Св. Кирил и Методиј", Скопје (1992-1993). Од 1993-1999 г. е Вонреден и ополномоштен Амбасадор на Република Македонија во Светиот престол и Словенија. Актуелно е Декан на факултетот за политички науки на ФОН Универзитетот и раководител на Последипломските студии на ФОН Универзитетот. Димитар Мирчев е основач и Претседател на Европското движење во Република Македонија, Амбасадор на мирот на Универзалната светска федерација за мир и член на Глобалниот светски совет за мир. За особени заслуги во дипломатијата и меѓународното разбирање, во 1998 год. Неговата Светост Јован Павле II го прогласил за Витез на редот на Св. Грегориј Велики. Димитар Мирчев е член на Комитетот на правни специјалисти на IPSA, Меѓународната асоцијација за политички науки, и редовен член на Меѓународната академија на природни и хуманитарни науки "Кнезови Шчербатови", Москва.

Публикации

Димитар Мирчев остварил обемен опус во повеќе општествени области (науката, образованието, политиката и јавноста). Неговите постигања се препознати и признати во Македонија и во странство. Објавил над 180 написи, книги, статии и монографии од областа на политологијата, политичката социологија и надворешната политика. Во текот на својата научно-истражувачка, образовно-воспитна дејност бил ментор на повеќе од 40 магистерски и 22 доктори на науки во областа на политичките и социолошките науки и евро - интеграциите. Голем број од овие магистри и доктори денес се наставници или истражувачи на универзитететите во Скопје, Битола, на ЈИЕ во Тетово, на ФОН, некои од нив работат во македонската дипломатија, новинарството, јавната администрација и култура. Преку Европското движење во Македонија чиј основач и претседател е, тој има организирано и одржано стотина трибини, натпревари во европски знаења, семинари и школи на кои земаат учество многу средношколци и студенти.

• Политолошки компендиум. 2003. Универзитет ФОН, Скопје
• Macedonian Foreign Policy 1991-2006. 2006. University FON. Skopje.
• Модерната политологија. Темелите на проучувањето на политичкиот живот (заедно со Др. Лидија Христова). 2008г. Култра, Скопје и Универзитет ФОН.