Пробај со девојката

Од Википедија — слободната енциклопедија
Прејди на прегледникот Прејди на пребарувањето

Пробај со девојката (англиски: Try the Girl) е роман од американскиот писател Рејмонд Чендлер (Raymond Chandler), објавена во 2005 година во издание на „Темплум“, како 39 книга во рамките на едицијата „Магма“. Преводот од англиски јазик го извршил Зоран Попоски.

Технички карактеристики[уреди | уреди извор]

Книгата е печатена во мал формат (18 сантиметри), во мек повез и има 90 страници. Таа е каталогизирана во Народната и универзитетска библиотека „Св. Климент Охридски“ - Скопје и ја носи меѓународната ознака ISBN 9989-902-72-0. Графичкото уредување и дизајн е дело на фирмата „Точка“. На предната корица е наоѓа слика на Рој Лихтенштајн, додека на задната корица е даден кус осврт врз книгата и попис на објавените книги во едицијата „Магма“. Покрај главниот текст, во книгата е дадена и белешка за авторот.[1]

Содржина[уреди | уреди извор]

Во Лос Ангелес, приватниот детектив Кармади бара некој Грк кој побегнал од жената. Пред влезот на црнечкиот бар „Шејми“, детективот гледа непознат човек со огромен раст, облечен во смешна облека. Воден од љубопитноста, детективот влегува во барот и таму се запознава со големиот човек - криминалецот Стив Скала кој штотуку излегол од затвор. По пауза од осум години, Скала се вратил во градот во потрага по поранешната девојка Бјула. Скала го претепува чуварот, а потоа го убива сопственикот на барот. Кармади го пријавува убиството во полиција по што започнува потерата по Скала. Тогаш, Кармади се обложува со еден полицаец дека ќе најде девојката на Скала.
Во потрага по девојката, Кармади најпрвин ја посетува жената на поранешниот сопственик на барот „Шејми“. Од неа, тој дознава дека токму таа го предала Скала на полицијата по што тој бил уапсен и осуден на затворска казна од осум години. Исто така, Кармади дознава дека Бјула (со ново име) работи како водителка во една локална радио-станица и дека секој месец ѝ плаќа на жената на Шејми по сто долари. Оттука, детективот оди во радио-станицата каде разговара со директорот на студиото Дејв Марино, кој му ја дава адресата на Бјула. Но, кога Кармади оди на наведената адреса, таму сфаќа дека е измамен, бидејќи Марино му ја дал својата домашна адреса. Таму, Кармади се запознава со жената на Марино, која мисли дека нејзиниот маж ја изневерува со Бјула. Затоа, таа му ја дава на Кармади вистинската адреса на Бјула. На заминување, еден човек го принудува Кармади да влезе во неговиот автомобил. Тој дознава дека станува збор за едне поранешен полицаец кого го изнајмил Марино. Возејќи се одредено време низ градот, Кармади успева да побегне.
Потоа, Кармади оди во куќата на Бјула каде ја затекнува вратата отворена. Внатре ја наоѓа жената на Морено со пиштол во раката, а во другата соба Морено лежи мртов на креветот. Сопругата на Морено му кажува на Кармади дека таа го убила сопругот поради неговото неверство, но пиштолот што го држи таа е празен. Кармади сака да ја повика полицијата, но тогаш во куќата влегува Стив Скала, кој му кажува дека тој го убил Морено. Додека двајцата разговараат, сопругата на Морено му го грабнува пиштолот на Скала и го застрелува неколкупати во стомакот. Тогаш, Кармади ја повикува полицијата која го носи ранетиот Скала во болницата.
По таа сцена, Кармади некое време скита низ градот, средувајќи ги впечатоците и спомените. Потоа, тој се враќа во куќата и таму ја затекнува Бјула, која му кажува дека таа го убила Морено. За да ѝ обезбеди оправдание, тој ја удира по лицето и по телото и ѝ ја кине облеката за да изгледа дека го извршила убиството во самоодбрана. Утредента, Кармади и Бјула одат во полицијата, каде дознаваат дека Скала во меѓувреме починал.[2]

Наводи[уреди | уреди извор]

  1. Рејмонд Чендлер, Пробај со девојката, Темплум, Скопје, 2005.
  2. Рејмонд Чендлер, Пробај со девојката, Темплум, Скопје, 2005.