Златно Славејче

Од Википедија — слободната енциклопедија
Прејди на прегледникот Прејди на пребарувањето
За други значења видете ја страницата за појаснување.

Златно славејче е македонски музички фестивал за деца што се одржува во Скопје.

Историја[уреди | уреди извор]

Фестивалот „Златно славејче“ бил основан во 1971 година од страна на неколку членови на Советот за грижа и воспитување на децата, и тоа: Александар Џамбазов, Васил Пујовски и Благоја Јордановски. Првото издание на фестивалот било одржано на 23 мај 1971 година, во Драмскиот театар во Скопје. На него биле изведени 25 композиции, а меѓу учесниците биле и Игор Џамбазов и Баже Маротов. Подоцна, на овој фестивал своите први настапи ги имале повеќе македонски музички ѕвезди, како: Калиопи, Тоше Проески, Влатко Илиевски, Симон Трпчески, Ана Дурловски, Давид Темелков итн. Заклучно со 2017 година, на фестивалот учестувале 5.000 деца (како солисти или како членови на хорот), а биле изведени околу 950 композиции. Според некои груби процени, на сите изданија на фестивалот присуствувале околу еден милион гледачи.[1]

Организација и раководење[уреди | уреди извор]

По осамостојувањето на Македонија, фестивалот се одржува под покровителство на претседателот на Република Македонија. Притоа, како покровители, сите претседатели присуствувале како гости на фестивалот, а децата од хорот биле поканувани на гости кај нив. Во 2010 година, по повод 40. годишнината од основањето, фестивалот бил награден од претседателот Ѓорге Иванов со одликувањето „Повелба на Република Македонија“.[2]

Подготовките за секое издание на фестивалот вообичаено траат околу седум месеци при што се одржуваат по неколку проби неделно. Фестивалот обрнува посебно внимание на изборот на децата кои треба да пеат, т.е. се внимава текстот на песната да биде соодветен на детето кое пее. Инаку, во рамките на фестивалот работи постојаниот хор „Златно славејче“, што ги придружува пеачите на сцената. Традиционално, првиот ден од секое издание на фестивалот има хуманитарен карактер и е наменет за децата со специјални потреби. Исто така, на фестивалот вообичаено учествуваат и гости од странство. Инаку, фестивалот нема натпреварувачки карактер и на него не се доделуваат награди.[3]

Од 1994 година, директор на манифестацијата „Златно славејче“ е Бобан Јосифовски.[4]

Златно славејче 2004[уреди | уреди извор]

На фестивалот биле изведени следниве песни:

  • Кај баба и дедо (Марија Коцевска),
  • Во песна се е можно (Филип Димовски),
  • Малата принцеа (Ирина Тренчевска),
  • Слонче (Петар Ѓуревски),
  • Медена песна (Тамара Гелевска),
  • Македонско оро (Деспина Спировска),
  • Ми се смее знакот СТОП (Хорот ,,Златно славејче,,),
  • Учам англиски (Изабела Поповска),
  • За другарството и љубовта (Мартина Аврамовска),
  • Прва љубов (Димитар Димитровски),
  • Што му е на оној Веле (Емилија Ланговска),
  • Елизабета (Емануел Петковски),
  • Лично момче (Лилјана Камчевска),
  • Гордана (Давид Темелков),
  • Ти си се (Татјана Танева),
  • Дајте раце (Теодора Трајковска).

Златно славејче 2014[уреди | уреди извор]

44. издание на фестивалот се одржало од 14 до 19 ноември во „Универзалната сала“ во Скопје. на фестивалот биле изведени 14 детски песни. Покрај тоа, хорот „Златно славејче“ и пејачот Даниел Кајмаковски снимиле заедничка песна со наслов „Свој“ (автор на музиката бил Александар Митевски, а текстот го напишал Огнен Неделковски), за која бил снимен и видео спот.[5]

Официјално мрежно место[уреди | уреди извор]

Официјална интернет страница на „Златно славејче“

Наводи[уреди | уреди извор]

  1. „До сега 5.000 деца пееле на Златно славејче“, Скопско ЕХО, бр. 67, 12 април 2018, стр. 11.
  2. „Ние сме против доделување награди“, Дневник, година XVIII, број 5614, вторник, 11 ноември 2014, стр. 21.
  3. „Ние сме против доделување награди“, Дневник, година XVIII, број 5614, вторник, 11 ноември 2014, стр. 21.
  4. „Ние сме против доделување награди“, Дневник, година XVIII, број 5614, вторник, 11 ноември 2014, стр. 21.
  5. „Ние сме против доделување награди“, Дневник, година XVIII, број 5614, вторник, 11 ноември 2014, стр. 21.