Меморијален центар на АСНОМ

Меморијален центар АСНОМ

Основана	2004.
Вид	културна установа
Место	Пелинце

Меморијален центар АСНОМ е културно историски и спортско рекреативен центар во кумановското село Пелинце, посветен на Првото заседание на АСНОМ одржано на 2 август 1944 година во манастирот Св. Прохор Пчински.

Комплексот се наоѓа крај реката Пчиња во Пелинце (Општина Старо Нагоричане) на два километра оддалеченост од историското место каде е одржано првото заседание, - манастирот Св. Прохор Пчински.

Историја

Идејата да се изгради Меморијален центар АСНОМ, се родила откога почнале проблеми со одбележувањето на заседанието на АСНОМ во манастирот “Св. Прохор Пчински” на територијата во Србија. Тензиите се зголелиле откако српскиот радикал Воислав Шешељ насилно ги извадил Спомен-плочите од заседанието на АСНОМ во 1998 година, така што изминатите години македонските делегации на празникот положувале венец кај чешмата во близина на манастирот.

Меморијалниот центар АСНОМ во Пелинце е отворен на 2 август 2004 во повод на 60-годишнината од Првото заседание на АСНОМ од претседателот на Македонија, Бранко Црвенковски.

Градба

Комплексот има површина од 8,5 хектари, на него се наoѓаат; игралишта, ресторан, амфитеатар за приредби, и музеј на АСНОМ во кој се пренесени спомен-плочите од Заседанието на АСНОМ што биле во “Манастир Прохор Пчински”. Проектант на Меморијалниот центар е архитектот Георги Константиновски. На фасадата на музејот се наоѓа монументален мозаик од 140 квадратни метри - Македонија дело на македонски сликар Рубенс Корубин. Во музеот се наоѓа копија на собата во манастирот „Прохор Пчински“, во која се одржало Првото заседание на АСНОМ, до неа е и спомен-собата во која се изложени документите од создавањето на македонската држава.

Надворешни врски

• Посета на меморијален центар „АСНОМ“, Црвен крст - Куманово