Висока мода (филм)

Од Википедија — слободната енциклопедија
Прејди на прегледникот Прејди на пребарувањето

Висока мода (француски: Pret-a-Porte) е американски филм од 1994 година, во режија на Роберт Алтман, кој е автор и на сценариото, заедно со Барбара Шулгасер. Главните улоги ги толкуваат: Марчело Мастројани, Софија Лорен, Џулија Робертс, Ким Бејсингер, Тим Робинс, Руперт Еверет, Жан-Пјер Касел, Кјара Мастројани, Анук Еме, Роси де Палма, Форест Витекер, Трејси Алман, Линда Хант. Исто така, во филмот се појавуваат и Хари Белафонте, Шер и многу познати лица од светот на модата. Филмот, кој во САД се прикажувал со насловот „Готово за носење“ (Ready to Wear), бил номиниран за наградата „Златен глобус“ во две категории.[1]

Содржина[уреди | уреди извор]

Дејството на филмот се одвива во Париз, за време на една од двете годишни модни ревии, на која се собира целата елита од светот на модата: модни креатори, манекенки, новинари, менаџери. Модната ревија се пренесува во живо, а неуморната новинарка Кити Потер (ја игра Бејсингер) секогаш е во центарот на настаните. Пред да почне ревијата, наеднаш умира претседателот на Здружението на модните креатори, Оливие де ла Фонтен (го игра Касел), а полицијата мисли дека тој е убиен. И додека неговата вдовица Изабел (ја игра Лорен) тагува по него, кришум, на модната ревија се појавува Серџо, т.е. Сергеј (го игра Марчело Мастројани), нејзиниот прв маж, кој побегнал во СССР и целиот живот го поминал таму. Истовремено, двајца модни новинари (ги играат Робинс и Робертс) остануваат без својот багаж и мора да ја пропуштат модната ревија, а времето го поминуваат затворени во хотелската соба. Во меѓувреме, познатата модна креаторка Симон Ловентал (ја игра Еме) дознава дека нејзиниот син (го игра Еверет) ја продал семејната фирма на некој богат бизнисмен од Тексас, така што таа е принудена да дизајнира каубојски чизми. Додека трае ревијата се случуваат бројни сплетки, љубовни афери, озборувања, итн. На крајот се утврдува дека Оливие де ла Фонтен не бил убиен, туку умрел случајно, на двајцата новинари им пристигнува багажот така што можат да ја напуштат хотелската соба, а модната ревија завршува така што Симон Ловентал ги испраќа своите манекенки сосема голи да шетаат по модната писта.[2] [3] [4]

Наводи[уреди | уреди извор]

  1. IMDb, Ready to Wear (1994), Awards (пристапено на 26.6.2018)
  2. „Висока мода“, Антена, број 842, 15.8.2014, стр. 22.
  3. „Висока мода“, Антена, број 882, 22.5.2015, стр. 22.
  4. IMDb, Ready to Wear (1994) (пристапено на 26.6.2018)