Еднаквост на масата и енергијата

Скулптура од 2006 на ајнштајновата равенка E = mc², висока 3 метри, на „Шеталиштето на идеите“ во Германија.

Во физиката, еднаквоста на масата и енергијата е концепт според кој било која маса има асоцирана енергија и обратно. Во специјалната релативност овој однос е прикажан преку формулата за масено-енергетска еднаквост

$E = mc^2\,$

каде што:

• E = енергија,
• m = маса,
• c = брзината на светлината во вакуум (celeritas),

Две дефиниции за масата во специјалната релативност можат да бидат правилно искористени со оваа формула. Ако масата во формулата е маса во мирување, енергијата во формулата е наречена енергија на мирување на телото. Ако масата е релативистичка маса, тогаш енергијата е релативистичка енергија.

Оваа формула е изведена од Алберт Ајнштајн, кој дошол до неа во 1905 во научниот труд „Дали инертноста на едно тело зависи од неговата енергетска содржина“, еден од трудовите од неговата „Чудесна година“ (Annus Mirabilis) Иако Ајнштајн не бил првиот кој предложил масено-енергетска еднаквост, а и различни други формули биле предложувани пред ајнштајновата теорија, Ајнштајн бил првиот кој предложил дека еднаквоста на масата и енергијата е општ принцип, последица од симетријата на просторот и времето.

Во формулата, c² е факторот на конверзија, потребен за претварање на единиците за маса во единиците за енергија. Формулата не зависи од специфични системи за мерење. Во SI системот, единицата за енергија е џул, за маса е килограм, а за брзина метар во секунда. Имајте предвид дека 1 џул е еднаков на 1 kg·m²/s². Во рамки на единиците, E (во џули) = m (во килограми) помножено со (299.792.458 m/s)².