Kool & the Gang

Kool & the Gang
Kool & the Gang на настап во 2017
Животописни податоци
Познат(а) и како	The Jazziacs The Soul Town Band The New Dimensions Kool & the Flames
Потекло	Џерси Сити, Њу Џерси, САД
Жанрови	R&B соул фанк диско
Период на активност	1964–денес
Издавачи	De-Lite Mercury ATO Curb Omnivore
Мреж. место	koolandthegang.com

Kool & the Gang ― американска ритам и блуз, соул и фанк-група основана во Џерси Сити во 1964 година. Основачки членови биле: браќата Роберт Бел - Кул и Роналд Бел; Денис Томас - Ди Ти, Роберт Микенс - Спајк, Чарлс Смит, Џорџ Браун, Сер Ерл Тун, Вудро Спароу - Вуди и Рики Вестфилд. Групата често го менувала составот и во текот на постоењето снимале песни од различни музички жанрови, како: џез, ритам и блуз, соул, фанк, диско, рок и поп-музика. Групата неколкупати го сменила името. Откако конечно се одлучиле за името Kool & the Gang, групата потпишала договор со De-Lite Records и го издала првиот албум, Kool and the Gang (1969).

Групата стекнала популарност кај пошироката публика по објавувањето на нивниот четврти албум Wild and Peaceful (1973); албумот ги содржел сингловите „Jungle Boogie“ и „Hollywood Swinging“ кои се пласирале во топ-10 на американската топ-листа за синглови. По период на намалена популарност, Kool & the Gang успеале повторно да го достигнат својот врв во периодот од 1979 до 1986 година откако претходно почнале да соработуваат со бразилскиот музичар и продуцент Евмир Деодату (португалски: Eumir Deodato) и по приклучувањето на пејачот Џејмс Тејлор - Џеј Ти во составот. Нивни најуспешни албуми од тој период биле: Ladies' Night (1979), Celebrate! (1980) и Emergency (1984). Emergency, со два милиони продадени примероци бил нивен најпродаван албум во САД. Нивните најпопуларни песни во тој период биле: „Ladies' Night “, „Celebration“, „Get Down on It“, „Joanna“, „Misled“ и „Cherish“. Групата продолжила да одржува концерти низ цел свет, а биле предгрупа на турнејата на Ван Хален во 2012 година и во 2014 година направиле своја светска турнеја по повод 50-годишнината од основањето на групата.

Kool & the Gang освоиле многу музички награди, меѓу кои: две Греми награди и седум Американски музички награди, а во 2006 година добиле „Награда од претседавачот за уметничко достигнување“ од Здружението на музички претприемачи. Групата била применета во Куќата на славните од Њу Џерси, ѝ била доделена наградата „MOBO“ за извонредно достигнување, наградата „Soul Train Legend“, наградата „Маријан Андерсон“, а добиле и своја ѕвезда на Булеварот на славните во Холивуд. Во 2007 година, групата била примена во Куќата на славата на вокалните групи. Во 2018 година, Белс, Браун и Тејлор исто така биле примени во Куќата на славата на текстописците, а групата била примена во Куќата на славата на рокенролот во 2024.

Kool & the Gang објавиле 23 студиски албуми и безмалку 70 синглови. Во светски рамки продале 70 милиони албуми.

Членови на групата

Сегашни членови

• Роберт „Кул“ Бел – бас, придружен вокал (1964–2020)
• Мајкл Реј – труба, придружен вокал (1979–1991, сесија/турнеја 2007–денес)
• Кертис „Фиц“ Вилијамс – клавијатури, придружни вокали (1982–1988, сесија/турнеја 1995–денес), алт-саксофон (сесија/турнеја 2021–сега)
• Шон „Шони Мек“ Меквилер – вокал, гитара (1991–1995, сесија/турнеја 1995–денес)

Поранешни членови

• Џорџ „Фанки“ Браун – тапани (1964–1998), клавијатури (1989–1993, 1998–2023), перкусии, придружен вокал (1964–2023; починал)
• Денис „Ди Ти“ Томас – алт-саксофон, флејта, придружен вокал (1964–2021; починал)
• Клејдс Чарлс Смит – гитара (1964–2006; починал)
• Роналд Бел – тенор саксофон, клавијатури, придружни вокали (1964–1989, 1992–2020; починал)
• Рики Вест – клавијатури, вокал (1964–1976; починал во 1985 година)
• Роберт „Спајк“ Микенс – труба, придружен вокал (1964–1986; починал во 2010 година)
• Вудроу „Вуди“ Спароу – ритам и главна гитара (1964–1969; починал)
• Лери Гитенс – труба, флугелхорн, придружни вокали, клавијатури (1975–1977, 1986–1988, сесија/турнеја 2000–2013)
• Ота Неш – тромбон (1975–1977; починал 2003 година)
• Кевин Ласитер – клавијатури, вокал (1976–1979)
• Клифорд Адамс – тромбон, придружен вокал (1980–1995; сесија/турнеја 1977–1980, 1995–2015; починал)
• Џејмс „Џ.Т.“ Тејлор – вокал (1979–1988, 1996–1999)
• Сер Ерл Тун – клавијатури, вокал (1979–1982)
• Гери Браун – вокал (1988–1990)
• Сени „Скип“ Мартин – труба, вокал (1988–1995; сесија/турнеја 1995–2007)
• Один Мејс – клавијатури, гитара, вокал (1988–1995)
• Џералд Харис – клавијатури, гитара (1992–1995)

Дискографија

Студиски албуми

• Kool and the Gang (1969)
• Music Is the Message (1972)
• Good Times (1972)
• Wild and Peaceful (1973)
• Light of Worlds (1974)
• Spirit of the Boogie (1975)
• Love & Understanding (1976)
• Open Sesame (1976)
• The Force (1977)
• Everybody's Dancin' (1978)
• Ladies' Night (1979)
• Celebrate! (1980)
• Something Special (1981)
• As One (1982)
• In the Heart (1983)
• Emergency (1984)
• Forever (1986)
• Sweat (1989)
• Unite (1992)
• State of Affairs (1996)
• Gangland (2001)
• The Hits: Reloaded (2004)
• Still Kool (2007)
• Kool for the Holidays (2013)
• Perfect Union (2021)
• People Just Wanna Have Fun (2023)

Надворешни врски

• Матична страница
• & The Gang Kool & the Gang на Discogs (англиски)
• Kool & the Gang на Семрежната филмска база на податоци (англиски)