Црна рибизла (науч. Ribes nigrum) — овошно растение. Растението црна рибизла е кратка грмушка што достигнува околу еден метар во висина. Лисјата ѝ се широки и силно назабени. Ако ги триеме лисјата од црната рибизла меѓу прстите, ќе испуштат силен, необичен мирис. Цветовите на црната рибизла се мали и се издвојуваат од цветовите на другите растенија со својата зеленикава боја. Нејзините плодови се исто така мали, речиси топчести и задржуваат одредена боја на врвот. Се собираат во гроздови, поради што изгледаат како обично грозје. Плодот е кисел или слатко-кисел и има ист мирис како лисјата.[1]
Црната рибизла е најбогата со витамини меѓу сите други овошја. Со витамини е 4 до 5 пати побогата од лимонот и јагодата, 10 пати од јаболкото, 20 пати од вишната, 100 пати од грозјето. Содржи најмногу витамин Ц, кој го олеснува варењето.
Од плодовите на црната рибизла се подготвуваат сокови, сирупи, компоти, вино и сл. При преработка на овошје, витаминот Ц е добро сочуван во производите. Пупките, лисјата и гранчињата на црната рибизла исто така содржат витамини. Од нејзините лисја и гранчиња се добива екстракт што се користи за настинки и други болести.[2]
