Леополд Стоковски

Од Википедија — слободната енциклопедија
Прејди на прегледникот Прејди на пребарувањето
Фотогарафија на Леополд Стоковски

Леополд Антони Стоковски, полски: Leopold Anthony Stokowski (Лондон, 18 април 1882 - Хемшајр, 14 септември 1977) — британски диригент од полско потекло, пропагатор на современата музика, еден од најпознатите диригенти во светот.

Биографија[уреди | уреди извор]

Стоковски бил роден во Лондон,[1] а музика студирал на Оксфорд и Кралскиот музички колеџ во Лондон. Најпрво свирел на оргули во Црквата на свети Бартоломеј во Њујорк, а како диригент првпат настапил во Париз, во 1908 година. На тој настап оставил многу добар впечаток кај критичарите и јавноста, по што брзо стигнал до местото диригент на симфонискиот оркестар во Синсинати. Во 1912 година добил понуда да го преземе Филаделфискиот симфониски оркестар. Овој оркестар го водел во наредните 25 години. Под негово раководство Филаделфискиот симфониски оркестар станал најдобар оркестар во Америка и еден од најпознатите во светот.

Последен пат јавно настапил во Венеција, во 1975 година, а потоа продолжил да снима во студио сè до 1977 година. Работел оркестарски транскрипции на композиции за оргули од Јохан Себастијан Бах. Починал во Хемпшир, Англија, на 13 септември 1977 година.[2]

Стил[уреди | уреди извор]

Стоковски од оркестарот извлекол еден сосема нов звук, познат како „Стоковски звук“, кој се состои од силен и богат звук на жичаните инструменти, и со своите театрални и неверојатно точно пресметани движења на рацете го претворал во продорен звук на лимените инструменти, истовремено оставајќи впечаток на неверојатна хармонија и прецизност. По 1929 година диригирал без палка, па таквиот начин на диригирање со широки движења станал синоним за Стоковски. При настапите сакал да ја истакне својата фигура, па барал подигнат подијум за диригентот и експериментирал со осветлувањето, за да ја изрази својата сенка на ѕидовите, со што оставал подлабок впечаток.

Леополд Стоковски бил прв диригент кој почнал да ги освојува медиумите. Со него професијата диригент станала популарна, што подоцна ќе ја нагласи и Херберт фон Карајан. Стоковски се појавил во неколку филмови, како и во анимираниот филм на Волт Дизни, „Фантазија“.

Наводи[уреди | уреди извор]

  1. Simon Callow. „He would fix the audience with his glinting eye...“, The Guardian, 23 септември 2005.
  2. Allen Hughes, "Leopold Stokowski Is Dead of a Heart Attack at 95", The New York Times, 14 September 1977.

Надворешни врски[уреди | уреди извор]