Готам

Слика на Готам од стрипот Batman (vol. 3) #14 (март 2017 г.)

Готам (англиски: Gotham) или Готам Сити (англ. Gotham City) — измислен град што се појавува во Ди-си комикс и е најпознат како домот на Бетмен. Живеалиштето на Бетмен првпат било посочено како Готам во Detective Comics бр. 48 во месец февруари 1941 г. Местоположбата на градот е во близина на Метрополис, а според повеќето стрипови, Готам се наоѓа во државата Њу Џерси.

Потекло на името

Постои вистинско англиско село Готам во грофовијата Нотингамшир.

Во англискиот фолклор, тоа се јавува во народните приказни за будалите. Најпознатата приказна раскажува за тоа како жителите на селото се преправале дека се луди за да не му дозволат на англискиот крал Јован Безземниот да помине низ нивната територија. Во друга приказна, тие изградиле ограда околу кукавица за да не ѝ дозволат да одлета. Овие приказни биле отпечатени во 1540 г. од англискиот писател и лекар Ендру Борд.

Во првото издание, книгата го носела насловот „Весели раскази за безумните мажи од Готам“, додека во второто издание зборот „безумни“ бил заменет со „мудри“. Во 1807 г., Вашингтон Ирвинг во збирката сатирични раскази „Салмагунди“ го споредил селото на будалите со Њујорк, и оттогаш зборот „Готам“ се претворил во еден од неговите прекари.

Како име на измислен мегалополис, тоа за првпат се појавило во февруари 1941 г. (Detective Comics #48), околу една и пол година по почетокот на издавањето на стриповите за Бетмен. Дотогаш, дејството се одвивало или во Њујорк или во неименуван град.