ОУ „Св. Кирил и Методиј“ - Центар

За други значења на поимот, погл. ОУ „Св. Кирил и Методиј“.

Свети Кирил и Методиј
Место
Општина:	Општина Центар
Наречено по:	Свети Кирил и Методиј
Нас. место:	Центар
Адреса:	ул. „1737“, бр. 1
Местоположба
Основни информации
Основано:	1836 (1836)
Директор:	Соња Кирковска
Настава на:	македонски
Контактни информации
Мреж. место	oukimcentar.edu.mk/
Е-пошта	info@oukimcentar.edu.mk
Телефон	02/3164-357
Факс	02/3164-357

Зграда на ОУ „Свети Кирил и Методиј“
Општи податоци
Координати	41°59′50.7″N 21°26′20.5″E
Почната	1963
Завршена	1964 (денешна зграда)
Урната	1903, 1963
Технички податоци
Подна површина	3101 м2

Основно училиште „Св. Кирил и Методиј“ (официјално: Основно општинско училиште „Свети Кирил и Методиј“ - Центар; скратено: ООУ „Св. Кирил и Методиј“) — централно основно училиште во скопската населба Центар, Општина Центар.

Училиштето е именувано по словенските просветители Свети Кирил и Методиј.

Историја

Училиштето било основано во 1836 година. Во 1830-тите години во дворот на тогашната новоизградена црква „Рождество на Пресвета Богородица“ било отворено првото училиште во Скопје, кое било ќелијно. Прв и главен учител бил Павле Хорват, хиландарски монах од дебарскиот манастир. Со отворањето на училиштето првпат децата на скопјаните можеле да учат на својот мајчин македонски јазик. Започнала борбата на Македонија против ширењето на грчкиот јазик и просвета.

Училиштето го добило името на светите солунски браќа на 11 мај 1858 година, кога е одржана првата прослава во нивна чест. Во 1848 година по покана на градските прваци во Скопје, дошол познатиот преродбеник и просветител Јордан Хаџи Константинов-Џинот. Тој го отворил првото световно училиште со настава на македонски јазик. Неговото доаѓање означува пресвртница за просветно-културниот и националниот живот во Скопје. Тој ги разделил учениците по одделенија, вовел клупи и современи наставни средства (заемни таблици, песочница, географска карта, глобус и др.).

Првата училишна зграда била во употреба сѐ до 1903 година, кога на истото место била изградена нова во која ќе биде изведувана настава сѐ до катастрофалниот земјотрес во 1963 година. По ослободувањето на Скопје, на 13 ноември 1944 година, училиштето продолжило со работа. 475 ученици првпат ја следеле наставата на македонски литературен јазик. Следната 1945/46 година, бил основан пионерскиот одред „Христијан Тодоровски-Карпош“, а почнала да работи и училишната кујна.

Во учебната 1948/49 година кон ОУ „Св. Кирил и Методиј“ било присоединето ОУ „Рајко Жинзифов“. На 24 јули 1962 година кон ОУ „Св. Кирил и Методиј“ било присоединето и „Цветан Димов“. Бројот на учениците бил зголемен на 1.300, распоредени во 37 паралелки од прво до осмо одделение. На 26 јули 1963 година, настанал катастрофалниот земјотрес во Скопје, кој коренито изменил многу работи и ја срушил училишната зграда. Многу жители го напуштиле градот и се населиле во новите градски населби, што резултирало со намалување на бројот на учениците во следната 1964 година на 541.

На 28 декември 1964 година, на местото на старата зграда урната во земјотресот почнала да работи новата зграда со 24 училници во кои учеле само ученици од 5. до 8. одделение. Во 1970 година, поради целосно менување на урбанистичкиот план во овој дел на градот и изградба на Народната и универзитетска библиотека, била урната и фискултурната сала.

Училиштето има своја кујна создадена во 1970 година.

Во учебната 1973/74 година училиштето го сменило своето име во „Кирил и Методиј“ губејќи го зборот „Свети“.

Училиштето било правно преосновано во 1985 година, верифицирано со актот ИО – ГНОО на Град Скопје.

Третиот период од постоењето на училиштето се одликува со голем број промени во начинот на неговото функционирање. Со независноста на Македонија, доаѓа и до промена на името, па така од 1993 година на свечената седница било пререгистрирано во „Свети Кирил и Методиј“ - Скопје.

Во 2019 година, училиштето добило нова спортска сала.

Директори

• Соња Кирковска

Надворешни врски

Матична страница