Хане Финсен

Хане Финсен (8 март 1925 - 14 септември 2023) — данска историчарка на уметност и директорка на музејот, која имала посебен интерес за француската уметност. Додека била во Националната галерија на Данска, во 1970 година ја организирала меѓународно признатата ретроспектива на Анри Матис. Во 1978 година, таа била назначена за директор и на колекцијата Хиршпрунг и на колекцијата Ордрупгард. На Ордрупгард, таа презентирала голем број изложби, вклучувајќи ги и оние за Вилхелм Хамершои и Едуар Мане. Во 2005 година, во соработка со Музејот на Луксембург, Финсен ја претставила „Матис – втор живот“ во Музејот за модерна уметност во Луизијана, изложба која се фокусирала на подоцнежните дела на сликарот.

Биографија

Родена на 8 март 1925 година во Копенхаген, Хане Финсен била ќерка на лекарот Валгард Финсен (1896–1980) и скулпторката Инге Ебструп (1899–1977). Израсната во добро ситуирана културна средина, по дипломирањето на гимназијата Орегорд во 1943 година, студирала историја на уметност на Универзитетот во Копенхаген. Додека била студент, таа помогнала да се организираат голем број изложби за француската уметност во Шарлотенбург. Во 1957 година се омажила за театарскиот режисер Кнуд Поулсен (1920–2003).

Откако магистрирала со фокус на францускиот импресионист Пјер-Огист Реноар, во 1953 година била назначена за научен асистент за збирки сликарство и скулптура во Националната галерија на Данска. Таа направила каталог на меѓународната колекција на модерна уметност на музејот, вклучувајќи ја и колекцијата на Јоханес Рамп која вклучувала дела од Матис. Во 1958 година станала куратор, а во 1965 година главен куратор за гравурите на бакарни плочи во музејот. По студиското патување во Соединетите држави во 1960 година, таа станала сè позаинтересирана за активности насочени кон поттикнување на интересот за уметнички колекции. Во 1967 година, таа организирала изложба на гравури насловена „Почит на француската уметност“ и од 1969 до 1971 година ја предводела работата на ретроспективата на Анри Матис, која била одржана во 1970 година со широко признание.

Во 1978 година, Хелстед била назначена за директор и на збирките на Хиршпрунг и на Ордрупсгард. Благодарение на нејзиниот ентузијазам, таа го привлекла вниманието на овие два музеи кои биле прилично тивки во претходните години. Таа организирала изложби на Вифредо Лам и Ева Соренсен во Хиршпрунг во 1978 година, а потоа „Скаген во Копенхаген“ во 1979 година, привлекувајќи значителен број посетители. Подеднакво успешни биле нејзините изложби во Ордрупгард, во кои биле вклучени „Вилхелм Хамершој“ (1981), „Гоген и Ван Гог и Кобенхавн“ (1893) и „Капел и Венце“ (1993), презентирајќи дела од Матис. Таа останала директорка во Ордрупсгард до 1995 година.

Во 2005 година, во соработка со Музејот на Луксембург, Финсен ја претставила „Матис – втор живот“ во Музејот за модерна уметност во Лузијана, изложба која се фокусирала на подоцнежните дела на сликарот. Презентирајќи околу 150 слики во 15-те години по операцијата на Матис во 1941 година, изложбата била инспирирана од интересот на Финсен за преписката помеѓу Матис и Андре Рувеј (1879–1962).

Финсен починала на 14 септември 2023 година, на 98-годишна возраст.