Нови мешани дијалекти на полскиот јазик

Новите мешани дијалекти на полскиот јазик - општа дефиниција за поновите дијалекти на полскиот јазик оформени со мешањето на говорите користени од страна на полските населеници кои се доселиле на западните, односно т.н. вратени територии по 1945 година. Поради јазичната различност помеѓу населението на новите територии на Полска, која често оневозможувала комуникација помеѓу нив, стандардната форма на полскиот јазик многу брзо ги заменила говорите. Како резултат на тоа, овие територии сега имаат само литературен јазик со малку регионални црти зависни од првобитните говори на новото население. Денес мешаните дијалекти покриваат поголем простор отколку што е назначено на дијалектолошките карти и се појавуваат и на територии каде се користат и други полски говори, како на пример варминскиот и мазурскиот.

Мешаните дијалекти ги сочинувале:

говорите користени од населението кое претходно живеело на некогашните источни територии (покраини) - севернопокраински (Литванија и Белорусија) и јужнопокраински (Украина);
говорите на населението кое живеело во Полска - мазовскиот, малополскиот и големополскиот;
остатоците од полските говори, кои се користеле на повратените територии и покрај влијанието на германскиот јазик.

Полски говор се појавил:

на териториите на Западното Поморје заменувајќи го западнопоморскиот дијалект на долногерманскиот јазик;
на териториите на Долна Шлеска заменувајќи го шлескиот дијалект на германскиот јазик;
на териториите на поранешната Источна Прусија заменувајќи го долнопрускиот дијалект на долногерманскиот јазик.

Станислав Урбањчик ги дели новите мешани дијалекти на три групи:

јужна со доминација на малополските селани;
северозападна со доминација на големополско-кујавско-поморските селани и Полјаците од Украина;
северна со доминација на мазовските селани и Полјаците од Литванија и Белорусија.