Днестарски Кањон

Од Википедија — слободната енциклопедија
Прејди на прегледникот Прејди на пребарувањето
Днестарски кањон
Дністровський каньйон
Hubyn.JPG
Днестарски кањон во Западна Украина
МестоТернополска област, Украина

Днестарски Кањон (украински: Дністровський каньйон) — кањон на реката Днестар кој се наоѓа во долината на истоимената река во Украина. На 3-ти февруари 2010 година, регионалниот парк на природата „Кањон Днестар“ бил промовиран во Национален парк на природата.

Топографија[уреди | уреди извор]

Днестарскиот кањон близу до устието на реката Стрипа.
Днестарскиот кањон во близина на селото Пилипче, Тернополска област, во западна Украина.

Реката Днестар е втора по големина и еколошки незагадена река во Украина. Кањонот е дел од реката Днестар, со должина од 250 километри и се протега од устието на реката Золота Липа до устието на реката Збрух. Тука Днестар влегува во кањон чија длабочина варира од 80 до 200 метри. Во кањонот се сливаат и водите на тамошните водени резервоари. Длабочината во најдлабоките места изнесува околу 50 метри.

Падините на кањонот се стрмни и составени од варовник. Тој бил избран за еден од Седумте природни чуда на Украина (украински: Сім природніх чудес України).

Во кањонот има повеќе од десетина карстни пештери и гротла. Малите водопади, наречени „момини солзи“ се сливаат преку карпи покриени со дебел слој на мововидни растенија.

Пејзаж[уреди | уреди извор]

Највредниот и најживописниот дел од целиот тек на реката Днестар е 250-километарскиот долг кањон кој се протега меѓу устијата на двете реки Золота Липа и Збрух. Природата на кањонот е специфична и оригинална. Рабовите на кањонот ги прават или карпести или пошумени падини, кои на места се високи и до 200 метри. На места има уникатни травертински карпи, геолошки ексфолијации, пештери и гротла, каде има и знаци за населување на праисториски луѓе. Низ кањонот се среќаваат прекрасни водопади, живописни острови и споменици на природата. Најубава е дивата и девствена природа втурната во светот на тишината и смиреноста.

Делови од кањонот[уреди | уреди извор]

Во рамките на кањонот има делови кои се кањон во кањон. Таков дел е Днестерско-Беремјански кањон, кој се наоѓа меѓу селата Хубин-Беремјани-Хмелева. Неговата длабочина изнесува 200 метри, а ширината од 1–5 километри, и должина од 10 километри.

Заштита[уреди | уреди извор]

Националниот парк на природата Днестарски Кањон бил основан со претседателската уредба 2010 и уредбата на Министерството за животна средина и природни ресурси на 12 декември 2011 година.[1]

Туризам[уреди | уреди извор]

Днестарскиот Кањон привлекува илјадници туристи секоја година.

Сплаварењето по реката Днестар е едно од најинтересните патувања низ Украина. Селата Исакив и Одаив, кои се наоѓаат во кањонот привлекуваат падобранци од Украина, Белорусија, Русија, Полска и Германија. Двапати годишно се одржуваат натпревари во падобранство за натпреварувачи од Украина, како и за меѓународни натпревари.

Наводи[уреди | уреди извор]

  1. „dnisterkanyon.org.ua“. dnisterkanyon.org.ua. конс. 2019-04-05. 

Надворешни врски[уреди | уреди извор]