Спуст

Од Википедија — слободната енциклопедија
Словенецот Андреј Шпорн во типична позиција за спуст во натпреварот во спуст на Зимските олимписки игри 2010

Спуст – натпреварувачка дисциплина во алпско скијање. Додека другите дисциплини во алпско скијање, слалом, велеслалом, супервелеслалом и алпска комбинација, ја истакнуваат техниката, според „Правилата на меѓународни натпревари“ на Меѓународната скијачка федерација (ФИС), спустот ги истакнува „шесте компоненти – техника, храброст, брзина, ризик, физичка подготвеност и процена“.[1] На меѓународните натпревари брзините од 130 км/ч се редовни. Натпреварувачите мора да заземат ефикасна аеродинамична позиција за да го минимизира отпорот на воздухот и да ја зголеми брзината.[2]

Историја[уреди | уреди извор]

Првичните правила за натпреварувањата во спуст биле поставени од сер Арнолд Лун за Британското државно првенство во скијање во 1921 година. Рекордната брзина од 160 км/ч (граница од 100 милји на час) ја поставил Јохан Клери во 2013 година на натпревар од Светскиот куп во Лауберхорн.[3]

Патека[уреди | уреди извор]

Правилата на Меѓународната скијачка федерација ги опфаќаат одликите како ширина на патеката, безбедносни мерки, висинска разлика, должина на патеката, стил и поставување на капиите.[1]

  • Ширина – патеките типично се широки 30 м со проширувања за скокови
  • Безбедност – опасните места на патеката треба да бидат заштитени со огради и мрежи
  • Висинска разлика – висинската разлика на патеката треба да биде од 450 до 1100 м за мажи и 450 до 800 м за жени. Висинската разлика на трки со две возења може да биде помала
  • Врати – патеката е означена со врати, наизменично со сина и црвена боја. Вратите се состојат од по два пара стапови меѓу кои е растегнато платно во црвена или сина боја. Ширината на поедина врата е најмалку 8 м.

Опрема[уреди | уреди извор]

Костим за спуст на австриската репрезентација

Опремата за спуст е различна од онаа за другите алпски дисциплини со помали брзини. Скиите се подолги 30% во однос на оние во слалом, за поголема стабилност при големи брзини. Штеките се закривени така што одат околу телото на скијачот кога тој зазема аеродинамична позиција. Како и во другите алпски дисциплини, натпреварувачите во спуст се облечени во прилепена облека за да го минимизира отпорот на воздухот, а кацигите се задолжителни.

Во обид да ја зголеми безбедноста, Меѓународната скијачка федерација во сезоната 2003-2004 го зголеми минималниот полупречник на кривините од 40 на 45 м, и ја определи минималната должина на скиите, 218 см за мажи и 210 см за жени.

Трки[уреди | уреди извор]

За разлика од трките во слалом и велеслалом каде натпреварувачите возат две возења, во трките во спуст има само едно возење. Времињата на едно возење се движат од минута и пол до две и пол минути во натпреварите од Светскиот куп, и мора да бидат преку 1 минута за да ги задоволат минималните меѓународни стандарди.

Најуспешни победници на сите времиња во спуст се Австријанката Ане-Мари Мозер Прел[4] (36 победи, 7 наслови во Светскиот куп) и Австриецот Франц Кламер[5] (25 победи, 5 наслови во Светскиот куп). Американката Линдзи Вон моментално доминира во натпреварите во спуст за жени со 37 победи и 7 наслови во Светскиот куп.[6][7]

Поврзано[уреди | уреди извор]

Наводи[уреди | уреди извор]

  1. 1,0 1,1 50th International Ski Congress (July 2016), The International Ski Competition Rules (ICR) (PDF) (англиски), Cancun: Fédération Internationale de Ski (FIS), стр. 83, Архивирано од изворникот (PDF) на 2017-06-29, Посетено на 2017-09-08.
  2. First Tracks!! Online Ski Magazine (October 11, 2011). Canadian Ski Racers Train in Wind Tunnel.
  3. http://www.snowkings.co.uk/skiracing/wc/races/downhillwengen/wengen-lauberhorn-downhill-ski-race.htm
  4. International Ski Federation (FIS). Biography: Annemarie Moser-Pröll. FIS Legends.
  5. International Ski Federation (FIS). Biography: Franz Klammer. FIS Legends.
  6. International Ski Federation (FIS). Biography: Lindsey Vonn. FIS Legends.
  7. The Australian (December 05, 2011). Lindsey Vonn wins 23rd World Cup downhill in Canada.

Надворешни врски[уреди | уреди извор]