Горан Трајкоски

Горан Трајкоски (21 ноември 1963, Титов Велес, СФРЈ) — македонски музичар, најпознат како основач и водач на групата „Анастасија“.

Образование

Основното и средното образование ги завршил во Велес, Струга, Охрид и Скопје. Студирал на Филолошкиот факултет, на групата англиски јазик и книжевност. Од крајот на 1980 до почетокот на 1990 година, работел како новинар во Македонската радио-телевизија - Македонско радио и во Канал 103 во областа на македонската народна и современата музика.

Музичка кариера

Трајкоски нема формално музичко образование, а со музика почнал да се занимава од крајот на 1970-те, кога во Струга членувал во панк-групата „Афективен набој“. По преселбата во Скопје, свирел во групата „Сарацени“, а во 1983 година ја формирал групата „Падот на Византија“. Исто така, бил член и на групите „Мизар“ и „Апореа“, за потоа да ја основа групата „Анастасија“. Со групите „Анастасија“ и „Мизар“ настапувал на музичките фестивали и сцени низ сите поголеми европски градови. Со Македонската изворна народна музика се запознал благодарение на народните уметници Вања Лазарова и Пеце Атанасовски, а со црковната и источноправославното пеење со посредство на отците Владимир и Стефан Санџакоски.

Со групата „Мизар“, Трајкоски работел на нивниот прв албум од 1988 година. Со групата „Анастасија“ ги објавил следниве албуми:

• На реките вавилонски/Премин (EP), издание на „Дом“ од Ниш и „Poeta Negra“ од Солун, 1989
• Before The Rain - sountrack, Polygram France, 1995
• Melourgia - Libra Music, 1997
• Face/Burn (EP) - Third Ear Music, 1998
• Nocturnal - Libra Music/Third Ear Music, 1999

Во 2011 година, заедно со Елена Христова, Трајковски го објавил албумот „Bioscopia“.

Со театарска музика се занимава од крајот на 1980-те при што, самостојно или како член на групата „Анастасија“, компонирал музика за претстави во театрите во Србија, Босна и Херцеговина, Грција и Македонија. Притоа, соработувал со театарските режисери: Владо Цветановски, Сашо Миленковски, Владимир Милчин, Јани Бојаџи, Бранко Брезовац, Раик Алниачик и Златко Славенски. Меѓу другите, тој ја компонирал музиката за театарските претстави:

• „Мартолозот“
• „Ајант“
• „Г-ца Јулија“ (КПГТ-Суботица)
• „Буре барут (Аморе театар-Атина)
• „Хамлет, „Розенкранц и Гилдестерн се мртви“, Собрани дела на Шекспир (Драмски театар-Скопје);
• „Еригон, „Пер Гинт“, „Црна дупка“ (МНТ-Скопје)

Тој има компонирано и музика за филм на Пред дождот (1994) на Милчо Манчевски, Среќна Нова 1903 (2013), Ругање со Христос (2018) и Кино љубов (2022) на Јани Бојаџи.

Надворешни врски

Изданија во кои Горан Трајкоски учествувал како музички автор и изведувач евидентирани од ВБУ Музички Регистар.