Македонски народен театар

Македонски народен театар
Кратенка	МНТ
Основана	1945
Тип	културна установа
Место	Скопје
Директор	Сашо Миленковски
Управа	околу 150
Мреж. место	www.mnt.com.mk

Македонскиот народен театар (скратено МНТ) е државен театар и најстара театарска институција во Македонија.

Историја

Македонскиот народен театар е конституиран со Одлука на Президиумот на АСНОМ (бр. 581/45) од 31 јануари 1945, како драмски театар. Во текот на првите две сезони МНТ и функционира исклучиво како драмски театар. Во текот на наредните четири години театарот се доорганизирал: оперскиот ансамбл бил конституиран во 1947 година (првата оперска премиера, „Кавалерија рустикана“, е изведена на 9 мај 1947), а балетскиот во 1949 (првата балетска премиера, Валпургиската ноќ, е изведена на 27 јануари 1949).

Ваквиот модел на театарска организација (драма-опера-балет, популарно наречен австроунгарски), е променет во 2004 година, кога МНТ го задржал драмскиот ансамбл, а операта и балетот станале посебна организација - Македонска опера и балет (МОБ).

Првиот драмски ансамбл на МНТ бил во состав:

• Димитар Ќостаров, режисер и директор на Драмата;
• Илија Милчин, актер и режисер;
• Тодор Николовски, Петре Прличко, Крум Стојанов, Трајко Чоревски, Мирко (Тихомир) Стефановски и Благоја Црвенков, актери;
• Томо Владимирски и Василие Поповиќ-Цицо, сценографи.

Кон овој состав се приклучуваат и дваесетина членови на техничкиот и административниот персонал, кои ја опслужуваат големата и исклучително функционална театарска зграда (изградена 1927).

МНТ работел во истата зграда до земјотресот од 1963, кога таа била тешко оштетена и подоцна урната. После ова, МНТ работел во привремениот објект Театар Центар, до изградбата на новата зграда на МНТ во 1980-тите. Таа зграда денес ја користи МОБ, а за потребите на МНТ се гради повторно, на истото место и со истиот план, зградата од 1927, урната во земјотресот.