Кајакарството во Македонија

Кајакарството во Македонија
Земја	Македонија
Раководното тело	Кајакарска Федерација на Македонија
Репрезентација/и	Фудбалска репрезентација на Црна Гора

Кајакарството во Македонија — спорт кој во Македонија со текот на годините добива сè поголема популарност. Кајакарството е управувано од страна на Кајакарската Федерација на Македонија.

Историја

Кајакарството во Македонија организирано се јавува со формирањето на првиот кајакарски клуб „Вардар” во Скопје во 1934 година на чело со Димитрије Ставриќ. По ослободувањето биле основани клубовите: „Стрмец” во Охрид (1948), „Црн Дрим” во Струга, „Пеликан” во Ресен, „Мирче Ацев” во Скопје.

Во 1949 година бил создаден Поморско-бродарски сојуз чие име било променето во Бродарски сојуз на Македонија во 1953година, во кој биле активни 34 бродарски друштва и клубови (1951). Формираниот Кајакарски Сојуз на Македонија (1966) бил поделен на посебни сојузи – за мирни и диви води (1975). Југословенското првенство на мирни води било организирано во Охрид (1948), а на диви води на Црн Дрим (1949). Во екипната конкуренција Македонија го зазела двапати третото место во Југославија (1948 и 1949) и еднаш второто (1950), а КК „Стрмец” третото место (1953) – сите на мирни води. КК „Мирче Ацев” од Скопје станал првак на Југославија на диви води (1957), а КК „Ластовица” од Скопје го освоил трипати првенството на Сојузната лига „Исток” (1971–1979). Значаен број на кајакари од Македонија станале прваци на Југославија и државни репрезентативци. На светските првенства биле освоени две четврти, на европските за јуниори едно трето, а на олимписките игри деветто место. Во Македонија биле одржани светски првенства во кајак на диви води во спуст и слалом (1975).

Секоја година се организираат меѓународни натпревари на Илинденскиот кајак слалом на реката Треска. Турнирот за прв пат се одржал во 1969 година кога бил формиран Иницијативен одбор од 9 члена на чело со Мемед Шакир за основање на традиционални меѓународни кајакарски натпревари на диви води на реката Треска посветени на Илинден, националниот празник на Македонија. Благодарение на квалитетните материјални и кадровски услови, овој меѓународен натпревар е прифатен во годишниот календар на Меѓународната кајакарска федерација (ИЦФ). Овие натпревари се одржани 42 пати (до 2010)[1], со учество на кајакари од југословенските републики, од балканските и од европските држави.