Мајкл Џордан

Од Википедија — слободната енциклопедија
Прејди на: содржини, барај


Џордан пред закуцување.

Мајкл Џефри Џордан (англиски: Michael Jeffrey Jordan) (роден 17 февруари 1963) - американски НБА кошаркар, активен бизнисмен, и сопственик на тимот од НБА „Шарлот Бобкетс“. Џордан важи за еден од најдобрите кошаркари на сите времиња.

Биографија[уреди | уреди извор]

Во февруари 2015 година, Џордан за првпат се нашол на списокот на „Форбс“ на најбогатите луѓе во светот. Имено, тој бил како 1741. најбогат човек на светот во 2014 година, со проценето богатство од над милијарда долари. Неговото богатство произлегува од неколку негови инвестиции: тој е сопственик на кошаркарскиот клуб „Шарлот“, а има договори со „Најк“, „Хенес“, „Геторејд“ итн. Во 2010 година, Џордан купил 80% од акциите на „Шарлот“ за 275 милиони долари.[1]

Професионална кариера[уреди | уреди извор]

Во 1984 година, Џордан потпишал за „Чикаго Булс“. Тој бргу се вклопил во тимот, и се наметнал како ѕвезда во лигата, импресионирајќи ја публиката со своите поени, и забивања од линијата за слободни фрлања. Со учеството во натпреварот во забивања, Џордан го добил прекарот „Воздушен Џордан“ (англиски: Air Jordan). Тој, исто така, важи за еден од најдобрите одбранбени играчи во кошарката. Во 1991 година, Џордан ја освоил првата шампионска титула во НБА со тимот на „Чикаго“, по што во следните две сезони освоил уште две титули. Потоа, тој привремено ја напуштил кошарката во период од две години, за следните три сезони (1996, 1997, 1998) пак да го освои шампионскиот прстен со „Чикаго Булс“.

Според многумина, Мајкл Џордан е најдобриот НБА играч на сите времиња, за што говорат шесте шампионски прстени, неговите пет награди за најкорисен играч на сезоната (MVP), шест награди за најкорисен играч во финалето на НБА, 10 шампионски титули за најдобар стрелец во сезоната, како и 14 настапи во НБА Ол-стар. Во текот на својата професионална кариера, Џордан остварил просек од 30,12 поени по натпревар.[2] Од 2009 година, тој е член на Куќата на славните во Спрингфилд.


Наводи[уреди | уреди извор]

  1. „Џордан стана милијардер“, Утрински весник, година XVI, број 4725, среда, 4 март 2015, стр. 20.
  2. „Џордан стана милијардер“, Утрински весник, година XVI, број 4725, среда, 4 март 2015, стр. 20.