Ватикански музеи

Ватикански музеи
Musei Vaticani
Основан	1506
Место	Ватикан
Посетеност	4.310.083 (2008)
Директор	Антонио Паолучи
Мрежно место	mv.vatican.va/StartNew_EN.html

Ватиканските музеи (итал. Musei Vaticani), се едни од најголемите во светот, и прикажуваат уметнички дела од огромната колекција собрана од римокатоличката црква низ вековите. Папата Јулиј II ги основал музеите во 16. век, односно во 1506. година. Систинската капела и Собите на Рафаел (Stanze della Segnatura) се на патеката на посетителите низ музеите.

Во 2007. година, музеите ги посетиле 4.310.083 луѓе.

Основање

Скалила во Ватиканските музеи.

Основањето на Ватиканските музеи се поврзува со една мермерна скулптура купена пред 500 години, т.е. во 1506. Скулптурата „Лаокон и синовите“ била откриена во едно лозје близу до црквата Санта Мариа Маџоре во Рим. Папата Јулиј II ја откупил статуата од сопственикот на лозјето и ја изложил во Ватикан. Оттогаш изложбата постојано се проширувала.

Пинакотека

Колекцијата прво била сместена во Домот на Борџија, а во времето на папата Пиус XI била изградена посебна зграда. Изложбата содржи слики на Микеланџело, Рафаел и Фра Анџелико.

Колекција на модерна религиозна уметност

Колекцијата на модерна религиозна уметност претставува слики и скулптури од познати автори, како што се Карло Кара и Џорџо де Чирико.

Скулптури

Една група на музеи претставуваат само скулптури:

Музеј на Пио и Клемент

Новото крило на музејот

Папата Клемент XIV го основал овој музеј во 1771., и првобитно содржел ренесансни и антички дела. Неговиот наследник, папата Пио VI ја проширил изложбата. Денес овој музеј изложува само скулптури од грчката и римската антика.

Има вкупно 54 галерии, од кои Систинската капела е последната и за да се дојде до неа мора да се минат претходните 53. Овие галерии изложуваат прекрасни скулптури, како што се „Заспаната Аријадне“, „Канделабрите на Барберини“, „Трите Грации“ и други.

Аугустус од Прима порта.

Музеј Кјармонти

Музејот е наречен според световното семејно име на папата Пио VII, кој го основал во раните 1800-ти. Музејот се состои од голема засводена галерија во која се изложени неколку статуи, саркофази и фризи.

Грегоријански Етрурски музеј

Основан е од папата Грегориј XIII во 1836 година и има осум галерии со важни Етрурски дела од археолошки ископувања. Делата вклучуваат вазни, саркофаг, бронзи и колекцијата Гуљелми.

Египетски музеј

Основан е од папата Грегори XVI и има голема колекција на староегипетски материјали, како што се папируси, мумии на животни, познатата колекција Граси и познатата „Книга на мртвите“.

Други експонати

Галеријата на географски карти.

• Неколку слики од Караваџо вклучувајќи ја и познататата Погребување на Христос (1602 - 1603)
• Портретот на Св. Јероним од Леонардо да Винчи
• Слики од Фра Анџелико, Џото, Рафаел, Тицијан и други
• Папскиот трон од црвен мермер, кој претходно бил сместен во базиликата Сан Џовани ин Латерано
• Огромна колекција на слики и таписерии од Рафаел, вклучувајќи ги и Собите на Рафаел
• Систинската капела
• Галеријата на географски карти - содржи топографски карти на цела Италија насликани на ѕидовите и долга 120м.

На последната недела од секој месец посетата на Ватиканските музеи е бесплатна. Поради тоа луѓето чекаат со часови. Но, и во редовни денови редиците пред музејот се долги и се чека и по еден час.

Надворешни врски

• Официјална страница на Ватиканските музеи
• Неофицијална страница на музеите