Убиства кај Смилковци

Од Википедија — слободната енциклопедија
Прејди на: содржини, барај
Петкратно убиство во близина на езерото кај с. Смилковци

Жалење за жртвите во село Радишани.
Место Смилковско Езеро, близу Скопје
Координати 42° 1′ 42″ СГШ 21° 28′ 57″ ИГД
Датум 12 април 2012, Велики четврток
19:30 - 22:30[1]
Мртви 5

На 12 април 2012, е извршено убиство на петмина лица со огнено оружје кај езерото во атарот на селото Смилковци, близу Скопје. Убиените се четири момчиња на возраст од 18 до 21 година од населбата Радишани: Филип Славковски, Александар Наќевски, Цветанчо Ацковски и Кире Трпковски, како и Борче Стевковски, 45 години, од селото Црешево. Убиствата се случиле меѓу 19:30 и 22:30 часот кога биле најдени телата на убиените.[1][2] Обдукцијата врз убиените покажало дека во нив е пукано од три типа огнено оружје, зашто се најдени чаури од три различни типа муниција, што сугерира дека има повеќе од еден извршител на чинот.[3]

Истрага[уреди]

Според Министерството за внатрешни работи на Република Македонија, четворица од убиените: Славковски, Наќевски, Ацковски и Трпковски, на возраст од 18 до 21 година, отишле да ловат риба на Смилковското Езеро со автомобил околу 15 часот на 12 април 2012, за време на православниот христијански празник Велики четврток. Нивните тела биле откриени облиени со крв вечерта во 22:30 часот од други рибари кои веднаш ја повикале полицијата. На истото место, но подалеку од четирите тела, било пронајдено телото и автомобилот на Борче Стефковски (45), кој исто така ловел риба.[4] За него се претпоставува дека бил убиен подоцна.[5] Увидот на местото на настанот траел преку целата ноќ, сè до до пладне на 13 април 2012 кога телата биле предадени на судските вештаци за обдукција, а автомобилите и чаурите биле подигнати од вештаците на крим-техника. За настанот бил формиран оперативен штаб кој ја раководел операцијата, а голем број на полицајци и инспектори биле на терен за собирање на информации околу евентуалниот идентитет на убијците и мотивот. Во тој момент, во интерес на истрагата, министерството се воздржало од давање други дополнителни информации.[2]

Автомобил „Опел Омега“, пронајден 10 км од езерото, за кој е потврдено дека бил на местото на убиствата.

На 14 април 2012, резултатите од обдукцијата покажале дека во жртвите е пукано од три типа на огнено оружје, најверојатно од повеќе напаѓачи. Според министерката за внатрешни работи, Гордана Јанкуловска: „Пукано е од непосредна близина. Не би можела да кажам колку точно е таа непосредна близина, меѓутоа пукано е од блиску. Видливи се трагите на телата од момчињата од огнено оружје и смртта настапила како резултат на огнострелните рани кои се евидентни на телата на момчињата и телото на петтата жртва, кој не е дел од групата момчиња кои заедно ловеле риба.“[6]

Автомобил „Опел Омега“ со темноцрвена боја бил пронајден на 10 километри од местото на убиствата. Министерката Јанкуловска на 16 април 2012 потврдила дека возилото што го нашла полицијата било на самото место на убиството. „Трагите укажуваат дека токму ова возило било на местото на убиството. Упатуваме апел доколку некој го препознае, го забележал, да се јави на бројот 199“, изјавила Јанкулоска.[7][8] Возилото било донесено од странство и не било региститрирано во Македонија, но имало украдени регистерски таблички, кои своевремено припаѓале на Мерцедес, кој веќе не учествувал во сообраќајот.[9]

Реакции[уреди]

Убиствата предизвикаа протести од страна на граѓани на населбата Радишани, од каде потекнуваат четирите убиени момчиња. При протестите граѓаните го блокира пристапот до Радишани и Љуботенски Пат.[2] Заради немири за време на протестот, биле оштетени пет возила, меѓу кои и еден автобус на скопскиот градски превоз.[10] Жителите во изјавите за медиумите изјавувале дека жртвите биле „мирни момчиња кои никому не згрешиле“[10] и побараа итно да биде расчистен случајот и да биде откриен злосторникот или злосторниците. Во населбата Радишани дошол и градоначалникот на Бутел, Петре Латиновски, кој побарал од сограѓаните да надвладее разумот.

Според министерката за внатрешни работи на Македонија, Гордана Јанкуловска, заради настанот биле мобилизирани сите полициски службеници и било зголемено полициското присуство низ Скопје за да се сопре евентуална ескалација на настаните. Според неофицијалните информации, педесеттина лица, главно жители од соседните села и населби, биле повикани на информативен разговор.[10]

Утрото на Велигден, 15 април 2012, по завршувањето на утринската литургија во Со­бор­ни­от храм на МПЦ, премиерот на Македонија, Никола Груевски изјавил:

Из­ра­зу­вам длабоко сочувство до семејствата на убиените. Она што во оваа при­го­да можам да го кажам е дека убијците ќе бидат фатени и казнети. И според за­ко­нот и од Бога. Ако воопшто ваквите луѓе разбираат што е тоа [...] Овој настан нè погоди сите нас. Нè погоди до срж, меѓутоа мораме да останеме ис­пра­ве­ни, да продолжиме да се справуваме со предизвиците. Сакам да им ис­пра­там порака и на сторителите дека кога-тогаш правдата ќе ги стиг­не и казната ќе ги стигне.[11][12]

— Никола Груевски

Претседателот на Македонија, Ѓорѓе Иванов, во исто време, изјавил:

Овие денови не можеме, а да не си спомнеме за убиството на петтемина и да сочувствуваме со нивните семејства и со нивните блиски. Очекуваме тие тоа што го сториле да бидат пронајдени и да бидат казнети.[12]

— Ѓорѓе Иванов

Метју Брунвасер, дописник од Софија за американскиот дневен весник New York Times („Њујорк Тајмс“), во напис со наслов „Убиствата ги засилуваат етничките тензии во Македонија“ забележува дека „...Македонците беа во жалост заради смртта на петмина сонародници, во ситуација кога има шпекулации дека убијците се етнички Албанци, со што се појавија стравувања за нова рунда на насилство меѓу заедниците.“[13][14]

На 23 февруари 2013 година во близина на езерскиот брег, на местото викано Кршиколе или Крст, веднаш до заобиколницата бил осветен камен темелник на црквата Црква „Св. 40 Маченици“, која е посветена на убиените момчиња.[15]

Наводи[уреди]

  1. 1,0 1,1 Кежаровски, Томислав (14 април 2012). „Крвав Велигден во Скопје“. Нова Македонија. http://novamakedonija.com.mk/NewsDetal.asp?vest=41412818267&id=9&prilog=0&setIzdanie=22556. конс. 16 април 2012. 
  2. 2,0 2,1 2,2 „ФОТО - Петкратно убиство крај Скопје - Блокади и протести“. Вечер. 13 април 2012. http://www.vest.com.mk/default.asp?ItemID=B6F0D98FAC21A44C96BE725C815051B6. конс. 16 април 2012. 
  3. „Жртвите кај Смиљковци убиени со три типа оружје“. Утрински весник. 14 април 2012. http://www.utrinski.com.mk/?ItemID=FAF34492263656449ADC0D2D1C093A05. конс. 16 април 2012. 
  4. Адамовски, Горан (13 април 2012). „Хорор во Скопје. Македонија во шок“. Утрински весник. http://www.utrinski.com.mk/default.asp?ItemID=69413DC64B0EFD4191F0FE87E8C5C6F1. конс. 16 април 2012. 
  5. „Прво ги убиле момчињата, а потоа повозрасниот рибар!“. Плус инфо. 15 април 2012. http://www.plusinfo.mk/vest/40196/Utvrden-e-profilot-na-storitelite-na-petkratnoto-ubistvo. конс. 16 април 2012. 
  6. Пешев, Александар (14 април 2012). „Јанкуловска: Убијците ќе се соочат со правдата“. Радио слободна Европа. http://www.makdenes.org/content/article/24548229.html. конс. 16 април 2012. 
  7. Станковиќ, Љубиша (16 април 2012). „Сомнителниот „опел“ бил на местото на злосторството“. Утрински весник. http://www.utrinski.com.mk/?ItemID=10B243C747561348A0F8EFFAE0C47D99. конс. 16 април 2012. 
  8. Митевска, Марија (16 април 2012). „Возилото кое го пронајде МВР било на местото на убиството“. Радио слободна Европа. http://www.makdenes.org/content/article/24550075.html. конс. 16 април 2012. 
  9. „МВР потврди: Темно-црвено возило опел учествувало во убиството кај Смилковско езеро“. Плус инфо. 16 април 2012. http://www.plusinfo.mk/vest/40290/MVR-potvrdi-Temno-crveno-vozilo-opel-uchestvuvalo-vo-ubistvoto-kaj-Smilkovsko-ezero. конс. 16 април 2012. 
  10. 10,0 10,1 10,2 „Реакции на грозоморното петкратно убиство“. Глас на Америка. 16 април 2012. http://www.voanews.com/macedonian/news/skopje-147357425.html. конс. 16 април 2012. 
  11. „Најголемиот дел од куршумите ја погодил целта“. Вест. 16 април 2012. http://www.vest.com.mk/default.asp?ItemID=887BA5487DAE41449CD4C6CB53466E3B&arc=1. конс. 16 април 2012. 
  12. 12,0 12,1 „Правдата ќе ги стигне убијците, порачаа Иванов и Груевски“. Утрински весник. 15 април 2012. http://www.utrinski.com.mk/?ItemID=10B47B79B650F54D8CABD695DB151448. конс. 16 април 2012. 
  13. „Њујорк Тајмс: „Убиствата ги зголемуваат етничките тензии““. Плус инфо. 16 април 2012. http://www.plusinfo.mk/vest/40289/Njujork-Tajms-Ubistvata-gi-zgolemuvaat-etnichkite-tenzii. конс. 16 април 2012. 
  14. Brunwasser, Matthew (16 април 2012). „Killings Heighten Ethnic Tensions in Macedonia“. New York Times. http://www.nytimes.com/2012/04/16/world/europe/killings-heighten-ethnic-tensions-in-macedonia.html?_r=2&emc=tnt&tntemail0=y. конс. 16 април 2012.  (англиски)
  15. „Ќе се гради црква кај Смиљковското Езеро“ (на македонски). А1 on. 20:17, 21/02/2013. http://a1on.mk/wordpress/archives/105608. конс. 21 февруари 2013. 

Надворешни врски[уреди]