Пеколен рај

Пеколен рај (јапонски: 地獄楽, англиски: Hell's Paradise: Jigokuraku) — јапонска манга создадена од Јуџи Каку. Била објавена бесплатно на примената и веб-страница на Shueisha Shōnen Jump+ од јануари 2018 до јануари 2021 г. Приказната е сместена во периодот едо во Јапонија и ги следи Габимару, нинџа; и Јамада Асаемон Сагири, погубничка, во нивната потрага по еликсирот на бесмртноста. Серијата е лиценцирана за англиско издание од Viz Media во Северна Америка. Дополнително, аниме-адаптација на MAPPA се прикажувала од април до јули 2023 г., со втора сезона во развој.^[1]^[2]

Содржина[уреди | уреди извор]

Разоткривачко предупредување: Следат подробности што го разоткриваат дејството и/или заплетот.

Серијата ја следи приказната за Габимару, вешт нинџа познат како „Празниот“ поради неговото бесчувствително однесување и борбена моќ. Тој е осуден на смрт за неговите злосторства, но му се нуди шанса за помилување. Шогунот го задолжува со навидум невозможна задача: патување до таинствениот остров наречен Шинсенкјо и враќање на еликсирот на бесмртноста. Во придружба на Габимару е Јамада Асаемон Сагири, неговата погубничка со свое тешко минато. Заедно, тие тргнуваат на ова опасно патување исполнето со други осудени злосторници, секој со свои поводи за барање вечен живот. Островот, меѓутоа, е далеку од обичен; тој е исполнет со опасни суштества, стапици и натприродни појави. Додека Габимару и Сагири се движат низ подмолните предели на островот и наидуваат на разни противници, тие склучуваат сојузи и се соочуваат со нивните внатрешни ѓаволи. По патот, ги откриваат мрачните тајни на островот и вистината зад еликсирот на бесмртноста.

Ликови[уреди | уреди извор]

Габимару (јап. 画眉丸) — најсилниот нинџа од Ивагакуре, каде што како дете бил одземен од неговите родители од страна на селскиот главатар и го научил да биде убиец. Тој е познат како Празниот Габимару (јап. がらんの画眉丸) поради недостатокот на емоции за време на неговата напорна работа. Меѓутоа, тој многу ја сака својата жена, мирната ќерка на селскиот главатар, која се однесува љубезно спрема него. Кога сакал да ги прекине врските со селото и да живее обичен живот со жена му, главатарот организирал да го фатат и да го осудат на смрт.

Сагири (јап. 佐切) — искусна мечувалка од познатото семејство на погубници Јамада Асаемон, каде што е една од двете женски погубници во кланот. Таа го ангажира Габимару за експедицијата, гледајќи ја неговата дарба и силната волја за живот. Сагири го зазема последното, 12-то место во хиерархијата на Јамада Асаемон.