Мал црногрб галеб

Од Википедија, слободната енциклопедија
Прејди на: содржини, барај
Мал црногрб галеб
Заштитен статус
Научна класификација
Царство: Животни
Колено: Хордати
Класа: Птици
Ред: Бекасови
Фамилија: Галеби
Род: Larus
Вид: Мал црногрб галеб
Биномен назив
Larus fuscus
Linnaeus, 1758

Малиот црногрб галеб (Larus fuscus) е птица од фамилијата на галебите која живее на Атлантскиот Океан, на бреговите од Европа. Ја има и во копното, крај езерата и реките. Таа е птица преселница која зимува јужно од Британските Острови до западна Африка. Редовен зимски посетител е на источниот брег на Северна Америка, веројатно од популацијата која се размножува во Исланд. Малиот црногрб балеб го има и во Македонија.

Опис[уреди]

Малиот црногрб галеб е помал од сребренастиот галеб[2]. Тоа е голема птица, со должина од 48 до 56 см, распон на крилја 117-134 см и тежина од околу 770 грама, само мажјакот е малку покрупен. Клунот е долг од 4.2 до 5.8 см, а тарзусот од 5.2 до 6.9 см.[3][4][5]Кај возрасните птици пердувите на главата, вратот, долниот дел од телото и опашката се бели. Горниот дел од телото, вклучувајќи ја мантијата и примарните пердуви за летање се темно сива или кафеаво-црна боја. Секундарните пердуви имаат бел раб на почетокот и крајот. Клунот им е прав, стиснат од страните и благо свиен надолу на крајот, со светло жолта боја, со светла црвена дамка одоздола на кривината на клунот. Очите им се светло жолти, а околу нив има прстен од црвеникава кожа. Нозете се жолти или жолто-портокалови. Главата им станува посива зимно време. Мажјаците и женките не се разликуваат. Младенчињата имаат скалести црно-кафени шарки по горниот дел од телото. Им треба 4 години да постигнат полна зрелост. Огласувањето му е подлабок звук што потсетува на плачење и смеење.

Исхрана[уреди]

Во вода, во потрагата по храна користи различни техники, вклучувајќи нуркање од површината или од воздухот. Лови риби, мекотели, инсекти, црви, и ретко мали глодари. На копно, бара храна во депониите и во близина на риболовните бродови. Ги уништува гнездата на другите птици, ги јаде јајцата и младенчињата. Јаде и растенија, плодови, семиња.

Размножување[уреди]

Овие галеби се моногамни. Уште на почетокот на пролетта птиците се веќе спарени. Во периодот на додворување се однесуваат провокативно, тие се многу бучни, ја фрлаат главата наназад или ја наведнуваат нанапред, го хранат партнерот и сл. Тие гнездат во парови или во мали колонии, кои вклучуваат и до неколку десетици парови. Гнездото е на земја, обично во приморска ледина со трева или во дините. Кога во колонијата нема доволно простор, може да направи гнездо и на покривите на зградите. Гнездото го градат со мов, сува трева, пердуви и др. Снесуваат од 1 до 3 јајца, темно кафеава или маслинова боја со темни дамки. Периодот на инкубација е 24-27 дена, а инкубираат и мажјакот и женката. Првите денови по испилувањето младенчињата се во гнездото или во непосредна близина. На возраст од 10 дена, младенчињата се во можност да направат долги прошетки на растојание до 30 м, а почнуваат да летаат по 30-40 дена. Птиците достигнуваат сексуална зрелост по 4-5 години.

Подвидови[уреди]

Постојат 3 подвида:

  • Larus fuscus fuscus
  • Larus fuscus intermedius
  • Larus fuscus graellsii

Галерија[уреди]

Наводи[уреди]

Mayr, E.1964. Systematics and the Origin of Species. Standard Book Number: 486-21212-2 p. 180.

  1. BirdLife International (2012). Larus fuscus. „Црвен список на загрозени видвови на МСЗП, верзија 2012.1“. Меѓународен сојуз за заштита на природата. http://www.iucnredlist.org/apps/redlist/details/106003231. конс. 16 јули 2012.  (англиски)
  2. Lesser Black-backed Gull, Cornell Lab of Ornithology
  3. Gulls: Of North America, Europe, and Asia by Klaus Malling Olsen & Hans Larsson. Princeton University Press (2004). ISBN 978-0691119977.
  4. Harrison, Peter, Seabirds: An Identification Guide. Houghton Mifflin Harcourt (1991), ISBN 978-0-395-60291-1
  5. CRC Handbook of Avian Body Masses by John B. Dunning Jr. (Editor). CRC Press (1992), ISBN 978-0-8493-4258-5.

Надворешни врски[уреди]