Мало белогушесто грмушарче

Мало белогушесто грмушарче
Заштитен статус
	; Незагрозен (МСЗП 3.1)
Научна класификација
Царство:	Животни
Колено:	Хордови
Класа:	Птици
Ред:	Врапчевидни
Семејство:	Грмушари
Род:	Sylvia
Вид:	Мало белогушесто грмушарче
Научен назив
	Sylvia curruca; (Linnaeus, 1758)

Малото белогушесто грмушарче (науч. Sylvia curruca) е вообичаена и широко распространета мала врапчевидна птица, која се размножува низ умерена Европа, освен на југозапад, и во јужна и централна Азија. Ја има и во Македонија. Таа е птица преселница која зимува во Африка јужно од Сахара, во Арабија и Индија.

Таксономија и систематизација[уреди | уреди извор]

Видот за првпат е опишан од Карл Лине, 1758 во неговата Systema Naturae. Само два подвида се издвојуваат од оваа птица и тие се мешаат и интегрираат во Средна Европа:

Sylvia curruca curruca – во западниот дел од опсегот;
Sylvia curruca blythi – во источниот дел од опсегот, врвот на главата е посветол и издвоен од лицето со бела линија над окото.

Уште два таксона има во зоната на интеграција, распространети од северниот дел на Касписко Море до Монголија.^[2] Филогенијата на овие два таксона не е доволно проучена и тие можеби ќе се префрлат во некој друг вид или ќе се сметаат само за хибриди:

Sylvia curruca/minula halimodendri
Sylvia curruca/minula telengitica

Опис[уреди | уреди извор]

Кај малото белогушесто грмушарче половите не се разликуваат. Ова е мала птица, долга 11.5-13.5 см и тешка 12-16 грама. Горната страна од телото ѝ е кафеавосива, а долната белкава. Главата е темносива, со потемносиво преку очите, а грлото е бело. Малку е помала од обичното грмушарче и ја нема костенливата нијанса на крилјата.

Поведение[уреди | уреди извор]

Живеалиштето на малото белогушесто грмушарче се отворените предели со грмушки, рабовите од шумите или ретките шуми со густи грмушки.

Се храни со инсекти, но и со бобинки и меко овошје.

Првите денови по пристигнувањето од преселбата, мажјаците почнуваат да пеат и градат неколку недовршени гнезда. Кога ќе се формира парот, едно од гнездата го завршуваат заедно. Тоа се наоѓа ниско во грмушките на 0.2-1.5 метри, а понекогаш, но поретко, и на висина 6-8 метри. Несат 3-7, најчесто 5 јајца, белкави со сивокафеави дамки. Пилињата го напуштаат гнездото на возраст од 11 до 13 дена, но уште не можат да летаат. Возрасните ги хранат до возраст од 3-4 недели.

Пеењето на малото белогушесто грмушарче е брза, растреперена секвенца од тит или чи повици.

Наводи[уреди | уреди извор]

↑ BirdLife International (2012). „Sylvia curruca“. IUCN Red List. Version 2012.1. International Union for Conservation of Nature. Посетено на 16 July 2012.
↑ Snow, David W.; Perrins, Christopher M.; Doherty, Paul & Cramp, Stanley (1998): The complete birds of the western Palaearctic on CD-ROM. Oxford University Press. ISBN 0-19-268579-1