Доли Партон

Доли Партон
Доли Партон
	Доли Партон ја прифаќа Liseberg Applause наградата во 2010.
Роден(а)	Доли Ребека Партон; 19 јануари 1946 (78 г.); Питман Сентер, Тенеси, САД
Занимање	Пејачка; текстописец; глумица; филантроп; биснисменка;
Активен период	1956–денес
Сопружник	Карл Дин (в. 1966)
	Потпис
	Страница; dollyparton.com

Доли Ребека Партон (англиски: Dolly Rebecca Parton; родена на 19 јануари 1946 година) ― американска кантри пејачка, текстописец, филмска глумица и бизнисменка. Прво била успешен текстописец за други пејачи, а во 1967 година Доли Партон го објавила својот деби албум Hello, I'm Dolly. По овој албум имала успешни години во музиката (како соло пејачка и во низа дует албуми со Портер Вагонер). Во текот на 1970-тите честопати била на врвот на топ листите, а нејзините албуми имале голем комерцијален успех. Успесите продолжиле и во 1980-тите. По малиот пад во 1990-тите, во новиот милениум продолжила со успесите.

Доли Партон, со кариера од преку 50 години, го носи епитетот „легенда на кантри-музиката“. Доли Партон продала преку 100 милиони плочи ширум светот, а нејзините албуми од Здружението на индустријата за снимање на Америка (RIAA) се сертифицирани со златен, платинест и мулти-платинест тираж. 25 нејзини песни се искачиле на прво место на топ листата од Билборд за кантри-музичка што е рекорд за пејачка (заедно со Риба Мекентајр). Има рекордни 44 албуми кои се пласирале меѓу првите 10 албуми на топ листата за кантри албуми, а во последните 40 години има 110 песни кои се нашле на топ листа. Доли Партон компонирала преку 3.000 песни, меѓу кои се и: „I Will Always Love You“ (песна која два пати била на прво место на американската кантри топ листа, и меѓународен поп хит во изведба на Витни Хјустон), „Jolene“, „Coat of Many Colors“ и „9 to 5“. Како глумица, имала улога во филмовите Од 9 до 5 (1980) и Најдобрата мала јавна куќа во Тексас (1982), за кој била номинирана за Златен глобус за најдобра глумица, како и Вештачки дијамант (Rhinestone) (1984), Челични магнолии (1989), Директен разговор (1992) и Joyful Noise (2012).

Доли Партон освоила 11 Греми награди од 50 номинации, меѓу кои е и наградата Греми за животно дело; освоила десет награди од Здружението за кантри-музика, меѓу кои и пејач на годината и таа е меѓу седумте пејачки кои добиле Награда пејач на годината од Здружението за кантри-музика; пет награди од Академијата за кантри-музика, меѓу кои и пејач на годината; четири награди од People's Choice; и три Американски музички награди. Исто така, е во мала група уметници кои барем еднаш биле номинирани за награда Оскар, Греми, Тони и Еми. Во 1999 година, Партон била примена во Куќата на славните од кантри-музиката. Во 2022 година, била номинирана за Куќата на славните од рокенролот, таа прво ја одбила номинацијата, но потоа ја прифатила; Куќата на славните подоцна објавила дека Партон ќе биде примена.

Таа е ко-сопственик на The Dollywood Company, која управува со многу места за забава, меѓу кои е и забавниот парк Dollywood, водениот парк Splash Country и многу ресторански театари, како The Dolly Parton Stampede и Pirates Voyage. Доли Партон основала многу добротворни и филантропски организации, а најважна меѓу нив е Фондацијата Доливуд, која се занимава со проекти за овозможување образование и намалување на сиромаштијата во Источен Тенеси, каде што пораснала.