Мрежно ниво

Министерството за одбрана со проектот ARPANET барало врската меѓу изворот и одредиштето да се одржува и во случај ако некои компјутери меѓу нив бидат уништени. Исто така, архитектурата требало да овозможи пренос на податотеки но и пренос на говор во реално време. Овие барања влијаеле на тоа да се избере мрежа со комутација на пакети базирана на меѓумрежен слој без воспоставување на директна врска. Задача на меѓумрежниот слој е пакетите кои компјутерите ги уфрлуваат во било која мрежа да ги упатуваат до одредиштето кое може да се наоѓа и на друга мрежа. Пакетите на одредиштето може да стигнат во друг редослед од оној во кој се испратени, па задача на вишите слоеви е да го воспостави редоследот. Меѓумрежниот слој треба да решава проблеми на загушување на мрежата па неговата функција може да се спореди со онаа на мрежниот слој на OSI моделот. На интернет нивото основен протокол е IP (Internet Protocol). Други протоколи се ICMP и IGMP. Internet Control Message Protocol (ICMP) се користи за тестирање на мрежата, обезбедува пораки за дијагностика и грешки. ICMP "echo" пораките се користат од PING апликацијата за проверка на оддалечените уреди. Internet Group Management Protocol (IGMP) се користи кај мултикаст испраќања на UDP пакети до повеќе компјутери. Routing Information Protocol (RIP) работи со рутерите за откривање на патеките помеѓу мрежите. RIP избира патеки според бројот на хоповите. Open Shortest Path First (OSPF) исто како RIP, овозможува на рутерите да ги изградат табелите за рутирање. OSPF избира рути според повеќе карактеристики на врските помеѓу мрежите како опсегот и доцнењето и е погоден за поголеми мрежи. Address Resolution Protocol (ARP) се користи за откривање на локалната (MAC) адреса на станицата на мрежата ако е позната нејзината IP адреса.