Љубиша Кировски
| Љубиша Кировски | |
|---|---|
| Роден(а) | 1971 Тетово, .svg){kind=small} СР Македонија |
| Националност | Македонец |
| Занимање | виолинист и професор |
Љубиша Кировски (роден во 1971 во Тетово) — македонски виолинист и професор на ФМУ.
Животопис[уреди | уреди извор]
Кировски е роден 1971 година во Тетово. Дипломирал на Факултетот за музичка уметност (ФМУ) во Скопје во класата на проф. Зоран Димитровски, во чија класа и магистрирал со посебна пофалба CUM LAUDE. Специјализирал виолина и камерна музика на Европската Моцартова академија во Варшава. Настапувал како солист со Македонската филхармонија, со Камерниот оркестар „Скопски солисти“, како и со оркестарот на Санктпетербуршката капела. Како камерен музичар реализирал бројни настапи со квартетот Гајдов низ Македонија, Германија, Турција, Романија и со триото МАК во Лондон. Реализирал концерти на реномирани фестивали во Македонија, Србија, Црна Гора, Хрватска, Полска, Италија, Швајцарија, Бугарија, Шведска, Северен Кипар, Англија, САД, како и редовни настапи во Скопје. Кировски се усовршувал на Летната академија во Лозана, а како член на камерното дуо, ја добил Специјалната награда на Ц.Е.И., на натпреварот за камерна музика Trio di Trieste во Трст, Италија. Го снимил првиот компактдиск во живо од фестивалот Охридско лето, а вториот компактдиск во живо бил од концерт во Скопје. Добитник е на наградата „Златна лира“, која ја доделува Сојузот на музичките уметници на Македонија за најуспешно концертно остварување.
Кировски активно учествувал во жирикомисии на домашни и меѓународни натпревари, а бил и член на Управниот одбор на Сојузот на музичките уметници на Македонија, како и претседател на Сојузот на музичките уметници на Македонија од 2011 година.[1] Делувал и како концерт-мајстор на оркестрите на Македонската Филхармонија и Македонската опера и балет. За редовен професор на ФМУ бил избран на седница на Универзитетскиот сенат, одржана на 28 ноември 2012 година. Водач е на гудачкиот квартет „Гајдов“.[2] Женет е со пијанистката Маја Шутевска – Кировска, со која го сочинѕваат дуото Кировски. Негова братучетка е и позната пејачка од Тетово, Верица Пандиловска.