Куќа на Даскаловци (Вевчани)

Куќа на Даскаловци
Куќата во 2023 година
Општи податоци
Статус	споменик на културата
Вид	куќа
Стил	староградски
Град	Вевчани, Струшко
Земја	Македонија
Завршена	1910
Технички податоци
Катови	2

Куќа на Даскаловци — староградска куќа во струшкото село Вевчани, прогласена за значајно културно наследство на Македонија.

Историја

Куќата е изградена во 1910 година. Му припаѓала на два брата од старото семејство Даскаловци кои биле терзии, изработувајќи висококвалитетни народни носии. Татко им и останатите браќа биле меѓународно познати градители.

Архитектура

Чардакот.

Градбата е кромна по големина. Приземјето е изработено од камен, зарамнето со дрвени кушаци во сува ѕидарија. Над прозорците со капаци има сводесто украсување од тули. На приземјето била работилницата за носии и дуќанот за продажба. Катот е изѕидан од полна тула и има дрвени прозорци исто така сводесто украсени од полна тула. На овој кат биле просториите за живеење. Меѓукатната и покривната конструкција е направена од костенови греди. Покривот е повеќеводен со ќерамиди ставени врз платно од штици. Од костеново дрво е изработено и скалиштето кое ги поврзува приземјето и катот, а костенови се и сите внатрешни врати. На катот има средишно сместен затворен чардак, еркерно издаден на дрвени греди со украсување конкретно за ова село, наречено „вевчански кучиња“. Со вакви украси се и дрвените покривни градбени греди, кои со дрвени даски ја образуваат стреата.

Галерија

• 
• 
• 
• 
• 
• 

Поврзано

• Културно наследство на Македонија во Општина Вевчани