Архитектура

Од Википедија

Архитектура е вештина на изработување нацрти и обликување на градби која стои и како уметност и како наука. Самиот производ, градбите, вклучувајќи ја и внатрешноста на градбите, исто така претставуваат архитектура. Бидејќи под архитектура може да се подразбере секоја градба, група на градби или дел од градбата, видокругот на архитектурата е широк и вклучува нацрти и обликување на мебел, внатрешна архитектура, на згради, архитектура, на дворови, паркови и пејзажи, пејзажна архитектура, на градови, урбанистичко планирање, и региони, просторно планирање.

Зборот архитектура потекнува од старогрчкиот збор архитектон (αρχιτεκτων) што значи главен мајстор (αρχι=главен и τεκτων=мајстор, градежник).

Во најстариот запис за архитектурата, “За архитектурата” или “De Architectura”, Витрувиј или Витрувиус пишува дека архитектурата е основана на рамнотежата на трите начела: firmitas=цврстина, utilitas=корисност и venustas=убавина. Цврстина значи дека темелите на градбата се поставени на тврдо тло и материјалите се паметно одбрани, корисност значи дека уредувањето е без грешка и не постојат пречки при користењето на просториите, и убавина значи дека градбата е пријатна и со добар вкус.