Витамин Б6

За витаминот Б6 може да се каже дека е еден од најважните витамини во организмот. Тој е важен за формирањето на аминокиселините, а со тоа и на протеините. Витамин Б6 е потребен за следните функции: работата на мозокот и централниот нервен систем, производство на одредени невротрансмитери (пример серотонинот), правилно работење на мускулите, производство на некои хормони (адреналин и допамин), производство на хемоглобинот во црвените крвни зрнца, електролитна рамнотежа во телото, развој и раст на фетусот и новороденчето итн.

Каде го има витаминот Б6?

Во поголеми количини се наоѓа во лебниот квасец,во житните растенија,во гравот,сојата и други градинарски растенија.Во продуктите од животинско потекло се наоѓа во црниот дроб,бубрезите,месото,млекото и жолчката од јајце.

Како делува витаминот Б6?

Без витамин Б6 нема протеини, без протеини нема хормони, а без хормони сите функции во организмот се доведени во прашање. Да ги спомнеме само серотонинот, допаминот и мелатонинот, кои заедно го регулираат биолошкиот часовник, спиењето, когнитивната функција, чувствата и однесувањето. Витаминот Б6 учествува во изградбата на неколку невротрансмитери (материи кои овозможуваат пренос на нервните импулси). Недостатокот на витаминот Б6 доведува до невролошки и психолошки пореметувања.

Дозирање и токсичност

Препорачаната дневна количина (RDA) на витаминот Б6 изнесува 2 mg, а максималниот дневен сигурносен внес (upper safe level) е 200 mg. Најчеста доза за витаминот Б6 како суплемент е 10 до 25 mg дневно. Но, при некои посебни состојби се препишуваат и „мега“ дози од 200 до 500 mg дневно. Иако за возрасните т.н. сигурна доза е 200 mg витамин Б6 дневно, трудниците не би смееле да користат повеќе од 100 mg дневно. Дури и во тие дози, во некои случаи, се јавуваат главоболки и мачнина. Секое земање на витамин Б6 над 200 mg дневно подолго од 2 месеци би трбало да биде во консултација со лекар.

Витаминот Б6 е токсичен во големи дози, па можни се многу непријатни оштетувања на сензорните центри. Како последица на тоа оштетување се јавуваат пореметувања во движењето и во допирот.

Хиповитаминоза

Иако витаминот Б6 е важна компонента во исхраната, клиничките симптоми на негов недостаток се многу ретки. Недостатокот се јавува при примена на некои лекови или е поврзан со недостаток на другите витамини од Б групата. Симптомите на недостаток од витамин Б6 се воочуваат на кожата, централниот нервен систем и хематопоетскиот систем и вклучуваат: губење на косата, задржување на течности во организмот за време на бременоста, вкочанетост и грчеви во рацете и нозете, често мокрење, анемија и друго. Концентрацијата на витамин Б6 е намалена кај алкохоличарите, трудниците и кај жените кои земаат орални контрацептиви кои содржат естрогени. Витамиот Б6 се користи и како антидот кај пациенти кои користат големи дози на антитуберкулостатици (лекови кои ја намалуваат количиниата на витаминот во организмот). Препорачана дневна доза за возрасен маж изнесува 2.0мг/ден, додека за жени изнесува 1.6мг/ден, при нормална прехрана. Не се препорачува во лечење на акни и слични дерматози, при интоксикација со алкохол, астма, хемороиди, мигрени,= ниту како препарат за подобрување на апетитот или стимулација на лактацијата.