Југославија

Знамето на Југославија од 1945 до 1992

Александар I Караѓорѓевиќ - Обединувач на Југословенските народи. Крал на СХС 1921-1929, Крал на Југославија 1929-1934.

Југославија е име што означува три различни но последователни политички ентитети што постоеја во поголемиот дел од 20. век на Балканскиот Полуостров, а во чии рамки спаѓаа јужнословенските земји (меѓу кои и Република Македонија), со исклучок на Бугарија.

• Првата Југославија е кралство формирано во 1918 како Кралство на Србите, Хрватите и Словенците, кое е преименувано во Кралство Југославија во 1929 и постои под тоа име се до 1941 кога земјата беше окупирана од страна на Силите на Оската.
• Втората Југославија е социјалистичка земја формирана веднаш по Втората Светска војна, а од 1943 е позната како Демократска Федеративна Југославија (ДФЈ), од 1945 како Федеративна Народна Република Југославија (ФНРЈ), а потоа од 1963 како Социјалистичка Федеративна Република Југославија (СФРЈ). Во оваа форма таа Југославија останува се до 1991 кога четири од шесте републики што ја формираат и целосно се отцепуваат - Словенија, Хрватска, Република Македонија и Босна и Херцеговина.
• Третата Југославија го носи името Сојузна Република Југославија (СРЈ) и постои од 1992 до 2003 на територијата на Србија (вклучувајќи ги и автономните провинции Војводина и Косово) и Црна Гора. Во 2003, името Југославија официјално е укинато и земјата станува лабава унија наречена Србија и Црна Гора.