Resident Evil

Resident Evil
Создавач	Шинџи Миками Токуро Фуџивара
Изворно дело	Resident Evil (1996)
Сопственик	Capcom
Години	1996–
Матична страница
game.capcom.com/residentevil/

Resident Evil (македонски: Притаено зло), позната и во Јапонија како Biohazard (јапонски: バイオハザード, Бајохазадо) — медиумска франшиза на компанијата Capcom, заснована на серија видеоигри. Повеќето игри од серијата припаѓаат на жанрот ужас за преживување, но притоа, како разни гранки, така и некои главни игри, можат да припаѓаат на други жанрови, како што се пукачка игра од трето лице и шинска пукачка игра. Покрај видеоигрите, медиумската франшиза се состои од филмови (серијалот Притаено зло), анимирани филмови, телевизиски серии, стрипови и друга медиумска продукција.

Игрите од серијата, поврзани со заеднички приказни и ликови, користат теми и слики карактеристични за филмовите на ужасите: хероите од игрите се соочуваат со зомбија, други чудовишта и мутанти и мораат да се борат, спасувајќи си ги животите. За појавата на овие чудовишта во многу игри стои фармацевтската компанија Амбрела, која тајно развивала вируси со цел создавање биолошко оружје, вклучувајќи и супервојници — Тирани.

Дејството на раните игри од серијата се одвивало во измислениот американски град Ракун Сити и неговата околина — како последица на несреќа, неговото население се претворило во зомбија. Подоцнежните игри опфатиле и други места ширум светот и други закани — на пример, верски секти што користат паразити за поробување на верниците.

Играчки процес

Повеќето делови од серијата припаѓаат на жанрот ужас за преживување. Гледиштето во различните делови значително се разликува: меѓу главните делови, во Resident Evil 1, 2, 3, Code Veronica, 0 и преработката на првата игра се користи поглед од трето лице и статична камера; во Resident Evil 4, 5, 6 и преработките на вториот, третиот и четвртиот бројчен дел — поглед од трето лице со камера „зад рамо“; а во Resident Evil 7 и Village — поглед од прво лице.

За прикажување на околниот свет во првите три бројчени делови, како и во 0 и преработката на првата игра, се користат статични двомерни заднини, додека во сите останати — тримерни нивоа. Ликовите и противниците во сите делови се прикажани со помош на тримерни модели. Во зависност од делот, структурата на нивоата може да биде претставена со големи отворени места за истражување, праволиниски нивоа или последователна комбинација од двете. Во сите главни делови од серијата, истражувањето на нивоата е сврзано со решавање на разни загатки.

Во сите игри од серијата присутни се неколку ликови со кои може да се игра, кои или имаат одделни приказни, или се менуваат еден со друг во рамките на една кампања. Приказните на некои игри од серијата можат да се поминат во кооперативен режим за 2 играчи. Во некои игри се присутни и други едноиграчки и повеќеиграчки режими.

Боречкиот арсенал во игрите од серијата е претставен со различно огнено оружје, гранати и ножеви. Во некои делови, оружјето може да се видоизменува. Различни видови оружја користат различни видови стреливо, кое може да се најде на нивоата, да се собере од умрени противници или да се изработи од соодветни материјали. Материјалите исто така можат да се соберат од противници или да се најдат на нивото.

Исто така, ликовите имаат залиха на здравје, која е прикажана како бројчена вредност или текстуален опис во интерфејсот на играта, а која се намалува при добивање штета од противници. Здравјето може да се обнови со помош на посебни лековити спрејови или разни билки. Во повеќето игри од серијата присутни се зелени билки. Покрај зелените билки, во игрите од серијата може да бидат присутни и црвени и сини видови. Во овој случај, билките можат да се комбинираат меѓусебно во количина до три парчиња во какви било размери.

Во сите игри од серијата, хероите се соочуваат со различни видови противници: луѓе и животни заразени со вирус или паразит, нивни варијации или засилени верзии, разни видови чудовишта што се последица на опити на корпорацијата Амбрела и така натаму. Во сите главни игри од серијата присутни се босови — особено силни противници, за чие елиминирање обично се користат посебни тактики, а борбите со нив се одвиваат во неколку етапи. Покрај босовите, во игрите од серијата се појавуваат и посебни неранливи противници, како што се Немезис и Тиран, кои ги прогонуваат и се обидуваат да ги уништат хероите.

И покрај припадноста кон жанрот ужаси за преживување, главните игри од серијата можат, во поголема или помала мера, да припаѓаат и на жанровите пукачка игра од прво лице и пукачка игра од трето лице. Различните спинофови, за разлика од главната линија игри, можат да припаѓаат на други жанрови: на пример, Survivor и Survivor 2 се игри од жанрот пукачка игра од прво лице, The Umbrella Chronicles и The Darkside Chronicles — шински пукачки игри, The Mercenaries 3D, Operation Raccoon City и Umbrella Corps — пукачки игри од трето лице и така натаму.

Надворешни врски

• Матична страница
• Undead Bootcamp - Resident Evil Apocalypse - (2007 - Documentary)