Hypericum barbatum

Hypericum barbatum
Научна класификација [ у ]
Царство:	Растенија
клад:	Скриеносеменици
клад:	Евдикоти
клад:	Розиди
Ред:	Малпигиовидни
Семејство:	Кантариони
Род:	Кантарион
Вид:	Hypericum barbatum
Научен назив
	Hypericum barbatum; Jacq.

Hypericum barbatum — вид повеќегодишно тревесто растение кое припаѓа на родот Hypericum и семејството кантариони. Расте низ југоисточна Европа, (Грција, Бугарија, Македонија, Албанија, Србија, Црна Гора), јужна Италија, како и во Хрватска и Австрија. Неговите чашкини ливчиња имаат многу долги свиленкасти влакна, па оттука и специфичното име barbatum што значи „брадест“.

Опис и распространетост

Растението има повеќе исправени стебленца високи 10-45 см. Стебленцата се тенки, цилиндрични, голи, исправени или малку наведнати. Листовите се исправени нагоре или странично раширени, пократки од интернодиумите или еднакви, поретко подолги; форма јајцевидно-копјеста до линејна или елиптична, кон врвот стеснети, речиси заострени но со заоблен врв; во основата стеснети, приседнати и делумно го обвиваат стеблото; рабовите најчесто свиткани; горната страна зелена и гола, долната сивкасто-зелена со црни точкести жлезди; ламината најчесто без, а понекогаш со многу прозрачни жлезди, покрај кои има и малку црни точкести жлезди. Цветовите се собрани во метличесто-гроздовидни или метличесто-полуштитовидни соцветија. Брактиите се линејно-копјести, рабовите со долги реси, а површината со точкести или линејни црни жлезди. Чашкините ливчиња се долги до 8 мм, линејно-копјести, со многу црни линејни или точкести жлезди на површината, а рабовите со тенки и многу долги реси, подолги од ширината на ливчето. Венечните ливчиња се жолти, двојно подолги од чашкините (9-10 мм), целосно цели, кон врвот со многу црни точкести или линејни жлезди по целата или горната половина и остануваат прицветни. Прашниците се речиси еднакви со венечните ливчиња; антерите жолти со една црна жлезда. Плодната кутијка е јајцевидна, долга 6-9 мм, со округли или јајцевидни меурести смолни жлезди. Семките се долги 1-1,5 мм.^[1]

Се среќава на ливади, брдски и планински пасишта и покрај букови шуми до 2.100 метри надморска височина. Во Македонија е широко распространето низ сите планини. Познато е за Шар Планина, Јакупица, Скопска Црна Гора (Групче), Мавровско, Кораб, Дешат, Бистра, Јабланица, Галичица, Бабуна, Козјак (Прилепско), Илинска Планина, Баба со Пелистер, Ниџе со Кајмакчалан, Дудица, Кожуф, Осогово, Плачковица, Голак (Делчевско), како и клисурите на Радика и Мавровска Река.^[1]

Варијабилност

Hypericum barbatum има 20 познати варијанти или подвидови. Од нив најистакнати се:

Hypericum barbatum subsp. macedonicum
Hypericum barbatum f. acutifolium
Hypericum barbatum f. barbatum
Hypericum aucheri var. punctato-fimbriatum
Hypericum calabricum

Во Македонија се среќаваат следните подвидови:

Hypericum barbatum var. trichanthum - Ниско растение со густи листови. Се среќава на Кораб, Кајмакчалан и Галичица.^[1]
Hypericum barbatum var. macedonicum - Високо растение со разретчени листови. Сите листови на стеблото имаат многубројни густи прозрачни жлездести точки. Широко распространето растение по планините во Македонија: Шар Планина, Јакупица, Мавровско, Баба со Пелистер, Ниџе - Кајмакчалан, Кожуф, Плачковица и Голак.^[1]
Hypericum barbatum var. barbatum - Високо растение со разретчени листови. Сите листови на стеблото се без прозрачни жлездести точки. Распространет по сите планини во Македонија.^[1]