Dorycnium pentaphyllum

Dorycnium pentaphyllum
Научна класификација [ у ]
Непознат таксон (попр):	Lotus
Вид:	Dorycnium pentaphyllum
Научен назив
	Lotus dorycnium; L.
Синоними
	Dorycnium pentaphyllum Scop.;

Dorycnium pentaphyllum, познат исто под синонимот Lotus dorycnium (опишано од Карл Линеј) — повеќегодишен тревест вид на Lotus од фамилијата бобови опишан од Џовани Антонио Скополи. Видот е широко распространет во средоземниот регион.

Опис

Растението е повеќегодишно тревесто растение или мала полугрмушка, високо до 50 см и разгрането. Стеблото е приподигнато или исправено и покриено со густи прилегнати влакненца. Листовите се без рахис и се приседнати. Ливчињата се линејно-копјести или долгнавесто-обратнојајцевидни, покриени со прилегнати свиленкасти влакна. Ливчињата на горните листови се долги 6–20 мм и широки 2–4 мм.

Соцветијата се топчести, со пречник од околу 10 мм и составени од 5–15 цветови. Дршката на соцветието е долга 10–60 мм и покриена со прилегнати влакненца. Цветовите се долги 4–6 мм, а цветните дршки се покуси или еднакво долги со трубестиот дел на чашката и се покриени со прилегнати влакненца.

Чашката е долга 2,5–3 мм и е густо покриена со прилегнати свиленкасти влакна. Венчето е долго 4–6 мм, голо, бело или бледорозово. Барјачето е долго 4–6 (до 7) мм, долгнавесто-елиптично и во средината пошироко или малку стеснето. Крилцата се покуси од барјачето, а лаѓичката во горниот дел е надолжно свиткана, во основата има тенок и долг клинест дел, а нејзината горна половина е темновиолетова до црна. Плодот е гола, јајцевидна мешунка, долга 3–5 мм и широка 2–3 мм, која обично содржи едно семе.^[2]

Варијабилност

Dorycnium pentaphyllum subsp. pentaphyllum — ливчињата на горните листови се долги од 6 до 12 мм и 2 до 3 мм широки. Барјачето е зашилено.^[2]
Dorycnium pentaphyllum subsp. germanicum — ливчињата на горните листови се долги од 10 до 20 мм и 2 до 4 мм широки. Барјачето не е или е сосема слабо зашилено.^[2]

Распространетост во Македонија

Dorycnium pentaphyllum расте на суви тревести места во појасот на брдските пасишта. Неговите варијабилности различно се среќаваат на територијата на Македонија:^[2]

Dorycnium pentaphyllum subsp. pentaphyllum — од стари извори се наведуваат дека растението има присуство во Битола (1907 год) и на планината Водно (1969 год), но се смета дека овој подвид не е застапен на територијата на Македонија.^[2]
Dorycnium pentaphyllum subsp. germanicum — се среќава во Тетовско кај селото Рогачево, на серпентин.^[2]

Галерија

Наводи

1 2 „Lotus dorycnium L.“. Plants of the World Online. Royal Botanic Gardens, Kew. Посетено на 2018-10-03.
1 2 3 4 5 6 Мицевски, Кирил (2001). Флора на Република Македонија Том I, св. 5. Скопје: МАНУ. стр. 1349–1350.

Надворешни врски

[POWO_503605-1-1] 1 2 „Lotus dorycnium L.“. Plants of the World Online. Royal Botanic Gardens, Kew. Посетено на 2018-10-03.

[:0-2] 1 2 3 4 5 6 Мицевски, Кирил (2001). Флора на Република Македонија Том I, св. 5. Скопје: МАНУ. стр. 1349–1350.

[1]

[2]