Deadfall Adventures

Deadfall Adventures
Омот за верзијата на играта за Windows
Изработувач	The Farm 51
Издавач	Nordic Games
Композитор	Пјотр Мусиал, Павел Чинчо, Аркадиуш Реиковски, Јакуб Гавлина
Погон	Unreal Engine 3
Подлоги	Microsoft Windows, Xbox 360, PlayStation 3
Датум(и)	Windows, Xbox 360 15 ноември 2013 PlayStation 3 28 октомври 2014
Жанр	пукачка игра од прво лице, акционо-авантуристичка игра
Режим	едноиграчки, повеќеиграчки

Deadfall Adventures — акционо-авантуристичка игра со елементи на 3D-пукач и логички игри. Играта е издадена во 2013 г. за Windows и Xbox 360, а во 2014 г. е портирана на Linux и PlayStation 3.

Дејството на играта се одвива во 1938 г., во вселената на Алан Квотермејн, создадена од писателот Хенри Рајдер Хагард.

Играчки процес

Играта се состои од четири големи нивоа, а на секое од нив задача на јунакот е да ги пронајде скриените богатства (иако тоа не е задолжителен услов за завршување на нивото).

Исто така, на нивоата е потребно да се решаваат разни загатки. На пример, треба така да се насочи светлината од огледалата за таа да се спои во одредена точка, што овозможува поместување на камена плоча и пристап до саркофаг. Присутни се и логички елементи — на пример, користење динамит за рушење на конструкции што го препречуваат патот или наоѓање рачка за активирање лифт.

Во играта се претставени три вида богатства. Пронајдените артефакти овозможуваат зголемување на нивото на здравје и издржливост. Во потрагата по богатствата помага компасот, а при решавањето на загатките — тетратката на Алан. Јунакот може да користи и фенер, со чија помош ги осветлува темните делови од нивото, но и им нанесува штета на одредени непријатели.

Ликот се соочува со разновидни непријатели — вклучувајќи војници и чудовишта. За нивно уништување се користи различно оружје, а непријателите можат да бидат намамени и во стапици.

На почетокот на играта, јунакот е вооружен со два револвери, пушка Browning Auto-5 и автомат Томпсон, а подоцна се појавува можност да се користат и MP-38, гранати и друго оружје.

Содржина

Годината е 1938. Правнукот на славниот авантурист Алан Квотермејн, Џејмс Ли Квотермејн, заедно со агентка на американската влада, заминува за Египет во потрага по древниот артефакт познат како „Срцето на Атлантида“. Меѓутоа, набрзо станува јасно дека тие не се единствените што ја имаат оваа цел...

Прием и критики

Играта добила главно просечни одзиви. Основните забелешки биле упатени кон загатките, кои и покрај нивната релативно висока сложеност, се решавале лесно поради присуството на тетратката со насоки, што според дел од критичарите ги правела загатките „бесмислени“. На страницата Metacritic, збирната оценка на играта според оценките на играчите изнесува 53 од 100, врз основа на 31 преглед за верзијата на PC.

Рецензентите од страницата GameCritics.com ја споредиле играта со серијалот Tomb Raider. Критичарите потврдно го оцениле првиот дел од играта отколку вториот, истакнувајќи ја релативната едноставност на загатките. Присуството на чудовишта (на пример, мумии) било дочекано потврдно, бидејќи тие „го прават играчкиот процес поинтересен“. Исто така, на критичарите им се допаднала „линеарноста“ на нивоата, и покрај присуството на дополнителни патеки. Од друга страна, звучната подлога (особено гласовната глума на ликовите) и физиката во играта добиле одречни коментари.

Информативната страница GameRankings.com, врз основа на рецензии од други страници, ѝ доделила на играта оценка од 45 поени од 100.

Во летото 2018 г., благодарение на пропуст во заштитата на Steam Web API, станало познато дека точниот број на корисници на услугата Steam што ја играле играта барем еднаш изнесува 252.514 лица.