Aliens: Colonial Marines

Aliens: Colonial Marines
Изработувач	Gearbox Software
Издавач	Sega
Продуцент	Брајан Берлесон
Дизајнер	Џон Малки
Програмер	Крис Р. Гатери Чарлс Костик Чејс Сенски
Уметник	Брајан Козенс
Сценарист	Мајки Нојман
Композитор	Кевин Рипл
Серијал	Осмиот патник
Погон	Unreal Engine 3
Подлоги	PlayStation 3 Windows Xbox 360
Датум(и)	12 февруари 2013
Жанр	пукачка игра од прво лице
Режим	едноиграчки, повеќеиграчки
Носител(и)	оптички диск, дигитална распределба

Aliens: Colonial Marines (македонски: Осмиот патник: Колонијални морнарички пешадинци) — пукачка игра од прво лице, развиена од американското студио Gearbox Software и издадена од јапонската компанија Sega во февруари 2013 г. за PlayStation 3, Xbox 360 и Windows. Дејството на играта се одвива меѓу настаните од филмовите Осмиот патник 2 и Осмиот патник 3. Colonial Marines раскажува за група колонијални морнарички пешадинци принудени да им се спротивстават на платениците на корпорацијата „Вејланд-Јутани“ и да ги спасат преживеаните од вселенскиот брод „Сулако“. Играта содржи кампања со приказна што поддржува едноиграчки режим, како и кооперативен и повеќеиграчки режим, во кој играчите се натпреваруваат едни против други во различни режими.

Colonial Marines била во развој шест години и поминала низ доста бурен производствен циклус. Главниот развивач, Gearbox Software, одлучил да се сосредоточува на други проекти, како што се Duke Nukem Forever и Borderlands 2, поради што значителен дел од развојот го префрлил на аутсорсинг кај други студија. На играта во голема мера влијаел филмот на Џејмс Камерон Осмиот патник, а за дизајнот на местата бил ангажиран уметникот Сид Мид, кој работел со режисерот на создавањето на бродот „Сулако“.

И покрај тоа што Colonial Marines била продадена во тираж од милион примероци во Европа и САД, играта добила крајно одречни одзиви од критичарите и играчите. Била критикувана за многубројни технички проблеми, неквалитетна графика и слаба вештачка интелигенција на противниците. Се смета за една од најлошите игри како на 2013 г., така и во историјата на видеоигрите. Најсилен аспект на Colonial Marines бил препознаен повеќеиграчкиот режим. И покрај лошите одзиви, подоцна биле објавени четири пакети преземлива содржина, кои додале нови карти, нов кооперативен режим и нова кампања со приказна што се одвива пред главните настани на играта. Подоцна, играта била критикувана затоа што во демонстративните материјали за печатот изгледала значително подобро отколку при излегувањето, што довело до колективна тужба од двајца играчи против Gearbox и Sega за лажно рекламирање. Во 2017 г., еден модер ја подобрил вештачката интелигенција на противниците, поправајќи грешка во кодот на играта.

Играчки процес

Aliens: Colonial Marines претставува пукачка игра од прво лице, заснована на серијата научнофантастични филмови на ужасите Осмиот патник. Кампањата со приказна, која поддржува како единечен режим, така и кооперативен режим до четири лица, содржи единаесет мисии во кои играчите се движат од една контролна точка до друга, борејќи се против противници управувани од вештачка интелигенција. На играчот му се спротивставуваат вонземјанските суштества ксеноморфи и непријателски настроените платеници. Ксеноморфите се доста брзи и напаѓаат главно со канџи или плукаат киселина од опашката, додека платениците се побавни и користат огнено оружје. Бидејќи ликовите припаѓаат на измислената воена единица Колонијална морнаричка пешадија, прикажана во филмот на Џејмс Камерон Осмиот патник 2, играчите имаат арсенал од различни пиштоли, сачмарки, гранати, импулсни пушки, пламенофрлачи, автоматски куполи и паметни пушки што автоматски се насочуваат кон противниците. Морнаричките пешадинци исто така можат да користат апарати за заварување за херметизација на вратите и сетилници за движење за следење на невидливи непријатели.

Стреливото може да се најде кај поразените платеници или на одредени места на картата. Морнаричките пешадинци имаат животна лента поделена на сегменти, кои автоматски се обновуваат со текот на времето, или со помош на комплети за прва помош. Војниците имаат и оклоп што ги штити здравствените точки, но тој не се обновува. Ако играчите ја поминуваат играта во кооперативен режим, тие имаат ограничено време да го оживеат својот соборец, а ако играчот загине, нема да може да се врати сѐ додека другите војници не стигнат до контролната точка.

Во Colonial Marines присутен е повеќеиграчки режим во кој две екипи од по пет лица се соочуваат една со друга во четири режими. Едната екипа играчи се морнаричките пешадинци, а другата се ксеноморфите. По истекот на временскиот лимит, играчите ги менуваат улогите и повторно играат на истата карта. Режимите вклучуваат „Судир“ (собирање точки), „Истребување“ (активирање бомби во гнездата со јајца на ксеноморфите), „Спасување“ (стигнување до точката за евакуација) и „Преживување“ (издржување што подолго од нападите на ксеноморфите). За разлика од морнаричките пешадинци, играчите во улога на вонземјани играат од трето лице и не користат огнено оружје, но затоа имаат способност да трчаат по ѕидови и тавани, да напаѓаат во блиска борба со канџи и да испуштаат киселина од опашката.

Во единечната игра, играчите заработуваат искуствени точки, победувајќи противници, извршувајќи задачи и пронаоѓајќи колекционерски предмети. Играчите имаат два ранга — еден за морнаричките пешадинци и еден за вонземјаните. Кога ќе се добие доволен број искуствени точки, нивниот ранг се зголемува, отклучувајќи подобрувања на оружјето (за пешадинците) или нови вештини (за ксеноморфите). Извршувањето на задачите исто така отклучува можности за приспособување на изгледот на ксеноморфите и војниците, како и нови својства, достапни исклучиво за вторите во повеќеиграчкиот режим.

Приказна

Седумнаесет недели по настаните од филмот Осмиот патник 2, вселенскиот брод „Сефора“ испраќа баталјон колонијални морнарички пешадинци за да го истражат вселенскиот брод „Сулако“, кој се наоѓа во орбитата на планетоидот LV-426. Во внатрешноста на „Сулако“, пешадинците забележуваат ксеноморфи, и како последица на последователната борба, двата брода избувнуваат. Капларот Кристофер Винтер и редовите Питер О’Нил и Бела Кларисон откриваат дека платениците од истражувачкиот центар „Вејланд-Јутани“ се команданти на „Сулако“ и дека одгледуваат ксеноморфи на проучувачкиот брод. Непосредно пред уништувањето на двата брода, војниците, заедно со капетанот Круз, андроидот Бишоп и пилотот потпоручник Лиза Рид, се спасуваат на шатл и наоѓаат засолниште во урнатините на комплексот на колонијата „Надежта на Хадли“ на LV-426.

И покрај тоа што морнаричките пешадинци дознаваат за нападот на лицефаќачот (англ. facehugger) врз Кларисон, Круз му наредува на Винтер да се упати кон блискиот истражувачки центар „Вејланд-Јутани“, сместен во близина на напуштен брод со ксеноморфи, и да земе од таму декларација за некој непознат затвореник од „Сулако“. Во обид да ја спасат редовата Кларисон, Винтер и О’Нил ја придружуваат до објектот со цел да го убедат преживениот кадар да го отстрани ембрионот на вонземјанинот од нејзиното тело. Меѓутоа, по пристигнувањето, испрашуваниот доктор од „Вејланд-Јутани“ објаснува дека Кларисон веќе не може да се спаси, бидејќи ембрионот гради во неа инвазивна плацента од течностите и хранливите материи на носителот, а самата плацента, всушност, ги зафаќа сите органи на градниот кош. Така, дури и ако ембрионот на ксеноморфот биде изваден, таа сепак ќе умре. Сфаќајќи дека е осудена на смрт, Кларисон се збогува со О’Нил и Винтер, по што од неа излегува градолом (англ. Chestburster), кого веднаш го застрелува О’Нил.

Винтер и О’Нил ја враќаат декларацијата, која била испратена за да го пронајдат и спасат преживениот каплар Двејн Хикс. Хикс објаснува дека откако „Сулако“ полетал од LV-426, бродот бил нападнат од луѓе на „Вејланд-Јутани“. Во согласност со упатствата, Хикс, како единствено воено лице на бродот, бил изведен од анабиоза. Пожар во одделот со криокапсулите довел до тоа преживеаните во „Сулако“ — Елен Рипли, Њут и Бишоп — да бидат исфрлени надвор заедно со телото на неутврден маж, кого го замениле за капларот. Самиот Хикс е грабнат од платениците и подложен на мачење за време на испрашувањето под чело на андроидот Мајкл Вејланд, со цел да се дознае повеќе информации за потеклото на ксеноморфите и да се добие контрола над системите за вооружување на „Сулако“. Од Хикс, морнаричките пешадинци дознаваат и дека на истражувачкиот комплекс е приклучен превозен брод што работи на суперсветлосна брзина, што претставува последна шанса за војниците да избегаат од LV-426.

Откако го собира преостанатиот кадар на „Сефора“, Круз дава наредба за напад врз „Вејланд-Јутани“ со цел да го запленат суперсветлосниот брод. Винтер и Хикс го предводат нападот, но непосредно пред да успеат да стигнат до него, бродот одлетува. Во последен обид да го стигне, Круз долетува со шатлот до него и се урива во хангарот. Винтер се соочува со Кралицата Вонземјанин во одделот за хангари и се обидува да ја катапултира со помош на системот за исфрлање товар, но не успева. Круз се жртвува, успевајќи да ги вклучи моторите на шатлот, кој ја турка Кралицата надвор и паѓа по неа. Винтер, О’Нил, Рид, Бишоп и Хикс го земаат на нишан Мајкл Вејланд, и Хикс го убива. Во потрага по корисни информации, Бишоп се поврзува со Мајкл и изјавува дека сега имаат сѐ што е потребно за да започнат војна.

Надворешни врски

• Aliens: Colonial Marines Архивирано на 1 мај 2014 г.