Чингова окатка

Од Википедија — слободната енциклопедија
Чингова окатка
Научна класификација
Царство: Животни
Колено: Членконоги
Класа: Инсекти
Ред: Пеперуги
Семејство: Шаренци
Род: Лажни хазарки
Вид: Чингова окатка
Научен назив
Pseudochazara cingovskii
(Gross, 1973)

Чингова окатка (науч. Pseudochazara cingovskii) — ендемска пеперутка на Македонија што живее само на Плетвар, Прилепско, на површина не поголема од 1,5 км2 и на ниедно друго место во светот. Припаѓа на родот лажни хазарки (Pseudochazara).

Чингова окатка

Овие пеперутки се светлосиво обоени со што успешно се прикриваат од грабливците на исто така сивите камења и е одличен пример за камуфлажа.

Пределот кој го населува е сув, со каменита, варовничка подлога, која е прекриена со ретка вегетација, на надморска височина од 1000 до 1200 м.

Pseudochazara cingovskii

Како возрасна единка, пеперутка, лета од крајот на јули и почеток на август кога и се размножува и полага јајца, но сѐ уште не е потврдено во која форма ја минува зимата.

Главна закана за опстанокот на оваа пеперутка е каменоломот кој се наоѓа блиску до нејзиното живеалиште. Потврда за ова е тоа што постојат податоци дека големината на популацијата во изминативе години е намалена за 30%, односно брои не повеќе од 10 000 единки.

Оваа пеперутка го добила латинското име по македонскиот ентомолог Јонче Чинговски.

Наводи[уреди | уреди извор]

  1. Pseudochazara cingovskii. IUCN Red List. Version 2010.4. International Union for Conservation of Nature. 2009. Посетено на 23 март 2011.